ایک ایک قطرہ کا مجھے دینا پڑا حساب

ایک ایک قطرہ کا مجھے دینا پڑا حساب

خون جگر ودیعت مژگان یار تھا

اب میں ہوں اور ماتم یک شہر آرزو

توڑا جو تو نے آئنہ تمثال دار تھا

گلیوں میں میری نعش کو کھینچے پھرو کہ میں

جاں دادۂ ہوائے سر رہ گزار تھا

موج سراب دشت وفا کا نہ پوچھ حال

ہر ذرہ مثل جوہر تیغ آب دار تھا

کم جانتے تھے ہم بھی غم عشق کو پر اب

دیکھا تو کم ہوے پہ غم روزگار تھا

کس کا جنون دید تمنا شکار تھا

آئینہ خانہ وادی جوہر غبار تھا

کس کا خیال آئنۂ انتظار تھا

ہر برگ گل کے پردے میں دل بے قرار تھا

جوں غنچہ و گل آفت فال نظر نہ پوچھ

پیکاں سے تیرے جلوۂ زخم آشکار تھا

دیکھی وفاۓ فرصت رنج و نشاط دہر

خمیازہ یک درازی عمر خمار تھا

صبح قیامت ایک دم گرگ تھی اسدؔ

جس دشت میں وہ شوخ دو عالم شکار تھا

ek ek qatra ka mujhe dena para hisab

khun-e-jigar wadiat-e-mizhgan-e-yar tha

ab main hun aur matam-e-yak shahr-e-arzu

tora jo tu ne aina timsal dar tha

galiyon mein meri naash ko khinche phiro ke main

jan dada-e-hawa-e-sar-e-rah guzar tha

mauj-e-sarab-e-dasht-e-wafa ka na puchh hal

har zarra misl-e-jauhar-e-tegh-e-ab dar tha

kam jante the ham bhi gham-e-ishq ko par ab

dekha to kam hue pe gham-e-rozgar tha

kis ka junun-e-did tamanna shikar tha

aina khana wadi-e-jauhar ghubar tha

kis ka khayal aina-e-intizar tha

har barg-e-gul ke parde mein dil be qarar tha

jun ghuncha-o-gul afat-e-fal-e-nazar na puchh

paikan se tere jalwa-e-zakhm ashkar tha

dekhi wafa-e-fursat-e-ranj-o-nishat-e-dahr

khamyaza yak darazi-e-umr-e-khumar tha

subh-e-qayamat ek dam-e-gurg thi asad

jis dasht mein wo shokh-e-do alam shikar tha