تم نے بیمار محبت کو ابھی کیا دیکھا

تم نے بیمار محبت کو ابھی کیا دیکھا

جو یہ کہتے ہوئے جاتے ہو کہ دیکھا دیکھا

طفل دل کو مرے کیا جانے لگی کس کی نظر

میں نے کمبخت کو دو دن بھی نہ اچھا دیکھا

لے گیا تھا طرف گور غریباں دل زار

کیا کہیں تم سے جو کچھ واں کا تماشا دیکھا

وہ جو تھے رونق آبادیٔ گلزار جہاں

سر سے پا تک انہیں خاک رہ صحرا دیکھا

کل تلک محفل عشرت میں جو تھے صدر نشیں

قبر میں آج انہیں بیکس و تنہا دیکھا

بسکہ نیرنگی عالم پہ اسے حیرت تھی

آئینہ خاک سکندر کو سراپا دیکھا

سر جمشید کے کاسے میں بھری تھی حسرت

یاس کو معتکف تربت دارا دیکھا

tum ne bimar-e-mohabbat ko abhi kya dekha

jo ye kahte hue jate ho ke dekha dekha

tifl-e-dil ko mire kya jane lagi kis ki nazar

main ne kambakht ko do din bhi na achchha dekha

le gaya tha taraf-e-gor-e-ghariban dil zar

kya kahen tum se jo kuchh wan ka tamasha dekha

wo jo the raunaq-e-abadi-e-gulzar-e-jahan

sar se pa tak unhen khak-e-rah sahra dekha

kal talak mahfil-e-ishrat mein jo the sadr nashin

qabr mein aj unhen bekas-o-tanha dekha

baske nairangi-e-alam pe use hairat thi

aina khak sikandar ko sarapa dekha

sar-e-jamshed ke kase mein bhari thi hasrat

yas ko motakaf turbat dara dekha