تشنہ لب ہوں مدتوں سے دیکھیے

تشنہ لب ہوں مدتوں سے دیکھیے

کب در مے خانۂ کوثر کھلے

طاقت پرواز ہی جب کھو چکی

پھر ہوا کیا گر ہوا میں پر کھلے

چاک کر سینہ کو پہلو چیر ڈال

یوں ہی کچھ حال دل مضطر کھلے

رات تلچھٹ تک نہ چھوڑی تب کہیں

راز ہائے بادہ و ساغر کھلے

لو وہ آ پہنچا جنوں کا قافلہ

پاؤں زخمی خاک منہ پر سر کھلے

ہوں جو کثرت ہی کے قائل ان پہ کیا

راز فتح سبط پیغمبر کھلے

رونمائی کے لیے لایا ہوں جاں

اب تو شاید چہرۂ انور کھلے

اب تو کشتی کے موافق ہے ہوا

ناخدا کیا دیر ہے لنگر کھلے

یہ نظر بندی تو نکلی رد سحر

دیدہ ہائے ہوش اب جا کر کھلے

اب کہیں ٹوٹا ہے باطل کا طلسم

حق کے عقدے اب کہیں ہم پر کھلے

اب ہوا ہے ماسوا کا پردہ فاش

معرفت کے اب کہیں دفتر کھلے

فیض سے تیرے ہی اے قید فرنگ

بال و پر نکلے قفس کے در کھلے

جیتے جی تو کچھ نہ دکھلایا مگر

مر کے جوہرؔ آپ کے جوہر کھلے

tishna lab hun muddaton se dekhiye

kab dar-e-mai khana-e-kausar khule

taqat-e-parwaz hi jab kho chuki

phir hua kya gar hawa mein par khule

chak kar sina ko pahlu chir dal

yun hi kuchh hal-e-dil-e-muztar khule

rat talchhat tak na chhori tab kahin

raz ha-e-bada-o-saghar khule

lo wo a pahuncha junun ka qafila

paon zakhmi khak munh par sar khule

hun jo kasrat hi ke qail un pe kya

raz fath-e-sibt-e-paighambar khule

runumai ke liye laya hun jan

ab to shayad chehra-e-anwar khule

ab to kashti ke muafiq hai hawa

nakhuda kya der hai langar khule

ye nazar bandi to nikli rad-e-sahar

dida ha-e-hosh ab ja kar khule

ab kahin tuta hai batil ka tilism

haq ke uqde ab kahin ham par khule

ab hua hai masiwa ka parda fash

maarifat ke ab kahin daftar khule

faiz se tere hi ai qaid-e-farang

bal-o-par nikle qafas ke dar khule

jite ji to kuchh na dikhlaya magar

mar ke jauhar ap ke jauhar khule