تجھ سے کیا نسبت کہ تھے لیلی کے کالے ہاتھ پاؤں

تجھ سے کیا نسبت کہ تھے لیلی کے کالے ہاتھ پاؤں

حق نے تیرے نور کے سانچے میں ڈھالے ہاتھ پاؤں

ہاتھ پکڑے مجھ کو کھینچے پھر سوئے دشت بلا

اے جنوں اب کر دئے تیرے حوالے ہاتھ پاؤں

خواہ باندھیں خواہ جکڑیں ان کو زنجیروں میں وہ

ہم نے ان زلفوں کے ہاتھوں بیچ ڈالے ہاتھ پاؤں

ہاتھ الجھے جیب سے پھر پاؤں لپٹے خار سے

ہم نے زنداں سے نکلتے ہی نکالے ہاتھ پاؤں

سر سناں نے سینہ خنجر نے لیا ناوک نے دل

ہیں یہ تیری نذر اے تیغ جفا لے ہاتھ پاؤں

کر دیا ہے چور ہم کو نشۂ الفت نے داغؔ

اب بھلا کوئی سنبھلتے ہیں سنبھالے ہاتھ پاؤں

tujh se kya nisbat ke the laila ke kale hath paon

haq ne tere nur ke sanche mein dhale hath paon

hath pakre mujh ko khinche phir su-e-dasht-e-bala

ai junun ab kar diye tere hawale hath paon

khwah bandhen khwah jakren un ko zanjiron mein wo

ham ne in zulfon ke hathon bech dale hath paon

hath uljhe jeb se phir paon lipte khar se

ham ne zindan se nikalte hi nikale hath paon

sar sinan ne sina khanjar ne liya nawak ne dil

hain ye teri nazr ai tegh-e-jafa le hath paon

kar diya hai chur ham ko nasha-e-ulfat ne dagh

ab bhala koi sambhalte hain sambhale hath paon