تجھے کہتا ہوں اے دل عشق کا اظہار مت کیجو

تجھے کہتا ہوں اے دل عشق کا اظہار مت کیجو

خموشی کے مکاں میں بات اور گفتار مت کیجو

محبت میں دل و جاں ہوش و طاقت سب اکارت ہے

کہو کوئی عقل کوں جا کر بڑا بستار مت کیجو

عوض نقد دعا کے مفت ہے دشنام اس لب سیں

ارے دل عشق کے سودے میں پھر تکرار مت کیجو

اسے اونچا ہے ظالم دام نے تجھ مہربانی کے

ہمارے صید دل اوپر ستم کا وار مت کیجو

اگر خواہش ہے تجھ کوں اے سراجؔ آزاد ہونے کی

کمند عقل کوں ہرگز گلے کا ہار مت کیجو

tujhe kahta hun ai dil ishq ka izhar mat kijo

khamoshi ke makan mein bat aur guftar mat kijo

mohabbat mein dil-o-jan hosh-o-taqat sab akarat hai

kaho koi aql kun ja kar bara bastar mat kijo

ewaz naqd-e-dua ke muft hai dushnam us lab sin

are dil ishq ke saude mein phir takrar mat kijo

use uncha hai zalim dam ne tujh mehrbani ke

hamare said-e-dil upar sitam ka war mat kijo

agar khwahish hai tujh kun ai siraj azad hone ki

kamand-e-aql kun hargiz gale ka har mat kijo