بھلاتا لاکھ ہوں لیکن برابر یاد آتے ہیں

بھلاتا لاکھ ہوں لیکن برابر یاد آتے ہیں

الٰہی ترک الفت پر وہ کیونکر یاد آتے ہیں

نہ چھیڑ اے ہم نشیں کیفیت صہبا کے افسانے

شراب بے خودی کے مجھ کو ساغر یاد آتے ہیں

رہا کرتے ہیں قید ہوش میں اے وائے ناکامی

وہ دشت خود فراموشی کے چکر یاد آتے ہیں

نہیں آتی تو یاد ان کی مہینوں تک نہیں آتی

مگر جب یاد آتے ہیں تو اکثر یاد آتے ہیں

حقیقت کھل گئی حسرتؔ ترے ترک محبت کی

تجھے تو اب وہ پہلے سے بھی بڑھ کر یاد آتے ہیں

bhulata lakh hun lekin barabar yad ate hain

ilahi tark-e-ulfat par wo kyunkar yad ate hain

na chher ai ham nashin kaifiyat-e-sahba ke afsane

sharab-e-be khudi ke mujh ko saghar yad ate hain

raha karte hain qaid-e-hosh mein ai wae nakami

wo dasht-e-khud faramoshi ke chakkar yad ate hain

nahin ati to yad un ki mahinon tak nahin ati

magar jab yad ate hain to aksar yad ate hain

haqiqat khul gai hasrat tire tark-e-mohabbat ki

tujhe to ab wo pahle se bhi barh kar yad ate hain