بھرا کمال وفا سیں خیال کا شیشہ

بھرا کمال وفا سیں خیال کا شیشہ

کہ ہوئے بدر سیں پورا ہلال کا شیشہ

وو خوش دہن کی جدائی سیں نرم گلشن میں

ہر ایک غنچہ ہے رنگ ملال کا شیشہ

خیال عارض گل رنگ کی تجلی سیں

ہے آئنہ عرق انفعال کا شیشہ

تمام بو قلمونی کا ہے تجلی گاہ

نہیں خدائی میں دل کی مثال کا شیشہ

چمن میں عازم ہولی ہے وو بسنت پوش

ہوا ہے غنچہ لالا گلال کا شیشہ

خوشی سیں چرخ میں ہے آفتاب کی مانند

ملا جسے مے نور جمال کا شیشہ

نبی کی آل کا احوال سن ہوا پرخوں

سراجؔ دل ہے مرا رنگ آل کا شیشہ

bhara kamal-e-wafa sin khayal ka shisha

ke hue badr sin pura hilal ka shisha

wo khush dahan ki judai sin narm gulshan mein

har ek ghuncha hai rang-e-malal ka shisha

khayal-e-ariz-e-gul rang ki tajalli sin

hai aina araq-e-infial ka shisha

tamam bu qalamwani ka hai tajalli gah

nahin khudai mein dil ki misal ka shisha

chaman mein azim holi hai wo basant posh

hua hai ghuncha lala gulal ka shisha

khushi sin charkh mein hai aftab ki manind

mila jise mai nur-e-jamal ka shisha

nabi ki al ka ahwal sun hua purkhun

siraj dil hai mira rang al ka shisha