بھڑکی ہوئی ہے شمع شبستان زندگی

بھڑکی ہوئی ہے شمع شبستان زندگی

شعلہ نہ چوم لے کہیں دامان زندگی

مرنے کے بعد پھولوں سے تربت نواز دی

ہوتا ہے کون زیست میں پرسان زندگی

عیش و خوشی نشاط و طرب راحت و سکوں

ہیں ان سے بڑھ کے کون حریفان زندگی

بار الم اٹھانے کے قابل بنا دیا

کیا کم ہوا ہے مجھ پہ یہ احسان زندگی

آغاز باب نو ہے مری موت اے امینؔ

تبدیل کر رہا ہوں میں عنوان زندگی

bharki hui hai sham-e-shabistan-e-zindagi

shola na chum le kahin daman-e-zindagi

marne ke baad phulon se turbat nawaz di

hota hai kaun zist mein parsan-e-zindagi

aish-o-khushi nishat-o-tarab rahat-o-sukun

hain un se barh ke kaun harifan-e-zindagi

bar-e-alam uthane ke qabil bana diya

kya kam hua hai mujh pe ye ehsan-e-zindagi

aghaz-e-bab-e-nau hai miri maut ai amin

tabdil kar raha hun main unwan-e-zindagi