بہار گلشن ایام ہوں میں

بہار گلشن ایام ہوں میں

سحر نور و سواد شام ہوں میں

شتاب آ اے مہ عیسیٰ نفس تو

کہ خورشید کنار بام ہوں میں

اگر منظور ہے آنا تو جلد آ

کہ تجھ بن سخت بے آرام ہوں میں

بجائے مے تری دوری میں اے گل

برنگ لالہ خوں آشام ہوں میں

محب و مخلص و فدوی ہوں تیرا

سمجھ تو لائق دشنام ہوں میں

تجھے دیکھ آپ میں رہتا نہیں میں

غرض تجھ وصل سے ناکام ہوں میں

بہار آئی چمن میں گو مجھے کیا

گرفتار و اسیر دام ہوں میں

نشاں اپنا کہیں پایا نہیں یاں

فقط عنقا صفت یک نام ہوں میں

نہ پیغام و سلام و نے ملاقات

عبث تجھ عشق میں بد نام ہوں میں

نہ ہوں پروانۂ ہر شمع بیدارؔ

فدائے سرو گل اندام ہوں میں

bahar-e-gulshan-e-ayyam hun main

sahar nur-o-sawad-e-sham hun main

shitab a ai mah-e-isa nafas to

ke khurshid-e-kanar-e-bam hun main

agar manzur hai ana to jald a

ke tujh bin sakht be aram hun main

bajae mai tiri duri mein ai gul

barang-e-lala khun asham hun main

muhib-o-mukhlis-o-fidwi hun tera

samajh to laiq-e-dushnam hun main

tujhe dekh ap mein rahta nahin main

gharaz tujh wasl se nakam hun main

bahar ai chaman mein go mujhe kya

giraftar-o-asir-e-dam hun main

nishan apna kahin paya nahin yan

faqat anqa sifat yak nam hun main

na paigham-o-salam-o-ne mulaqat

abas tujh ishq mein bad nam hun main

na hun parwana-e-har shama bedar

fida-e-sarw-e-gul andam hun main