انقلاب (احمق پھپھوندوی)

یہ کہہ رہی ہے اشاروں میں گردش گردوں

کہ جلد ہم کوئی سخت انقلاب دیکھیں گے

نظام چرخ میں دیکھیں گے اک تغیر خاص

سکون دہر میں اک اضطراب دیکھیں گے

خدا نے چاہا تو اب جلد ہی وطن والے

وطن میں اپنا مشن کامیاب دیکھیں گے

دعائیں کی ہیں جو اہل وطن نے رو رو کر

یقیں ہے جلد انہیں مستجاب دیکھیں گے

زمانہ آنے ہی والا ہے جب ہم اے ظالم

تجھے بھی خوار تجھے بھی خراب دیکھیں گے

بہت ہی جلد ترے سر پہ بھی خدا کی قسم

خدا کا قہر خدا کا عتاب دیکھیں گے

تجھے بھی دیکھیں گے مجبور فاقہ و افلاس

تجھے بھی قید غم و اضطراب دیکھیں گے

تجھے بھی اپنی طرح جلد ہی بفضل خدا

اسیر سلسلۂ پیچ و تاب دیکھیں گے

تجھے بھی اپنی طرح پائے بند نالہ و آہ

یوں ہی مجال تباہ و خراب دیکھیں گے

رواں دواں تجھے ہندوستاں سے سوئے عدم

بہ قلب زار و بہ چشم پر آب دیکھیں گے

یہ دیکھنا ہے جو کچھ ہم کو اس میں دیر نہیں

بہت ہی جلد بہت ہی شتاب دیکھیں گے

ye kah rahi hai isharon mein gardish-e-gardun

ke jald ham koi sakht inqilab dekhenge

nizam-e-charkh mein dekhenge ik taghayyur khas

sukun-e-dahr mein ik iztirab dekhenge

khuda ne chaha to ab jald hi watan wale

watan mein apna mishan kamyab dekhenge

duaen ki hain jo ahl-e-watan ne ro ro kar

yaqin hai jald unhen mustajab dekhenge

zamana ane hi wala hai jab ham ai zalim

tujhe bhi khwar tujhe bhi kharab dekhenge

bahut hi jald tire sar pe bhi khuda ki qasam

khuda ka qahr-e-khuda ka itab dekhenge

tujhe bhi dekhenge majbur faqa-o-iflas

tujhe bhi qaid-e-gham-o-iztirab dekhenge

tujhe bhi apni tarah jald hi bafzal khuda

asir-e-silsila-e-pech-o-tab dekhenge

tujhe bhi apni tarah pae band-e-nala-o-ah

yun hi majal tabah-o-kharab dekhenge

rawan dawan tujhe hindostan se su-e-adam

ba qalb-e-zar-o-ba chashm par ab dekhenge

ye dekhna hai jo kuchh ham ko is mein der nahin

bahut hi jald bahut hi shitab dekhenge