بہار

گلشن عالم میں جب تشریف لاتی ہے بہار

رنگ و بو کے حسن کیا کیا کچھ دکھاتی ہے بہار

صبح کو لا کر نسیم دل کشا ہر شاخ پر

تازہ تر کس کس طرح کے گل کھلاتی ہے بہار

نونہالوں کی دکھا کر دم بدم نشو و نما

جسم میں روح رواں کیا کیا بڑھاتی ہے بہار

بلبلیں چہکارتی ہیں شاخ گل پر جا بجا

بلبلیں کیا فی الحقیقت چہچہاتی ہے بہار

حوض و فواروں کو دے کر آبرو پھر لطف سے

کیا معطر فرش سبزے کا بچھاتی ہے بہار

جنبش باد صبا سے ہو کے ہم دوش نشاط

ساتھ ہر سبزے کے کیا کیا لہلہاتی ہے بہار

خلق کو ہر لحظہ اپنے حسن کی رنگت دکھا

بے تکلف کیا ہی ہر دل میں سماتی ہے بہار

مجمع خوباں ہجوم عاشقاں اور جوش گل

دیکھ ان رنگوں کو کیا کیا کھلکھلاتی ہے بہار

گل رخوں کی دیکھ کر گل بازیاں ہر دم نظیر

گل ادھر خنداں ادھر دھومیں مچاتی ہے بہار

gulshan-e-alam mein jab tashrif lati hai bahar

rang-o-bu ke husn kya kya kuchh dikhati hai bahar

subh ko la kar nasim-e-dil kusha har shakh par

taza tar kis kis tarah ke gul khilati hai bahar

naunihalon ki dikha kar dam badam nashw-o-numa

jism mein ruh-e-rawan kya kya barhati hai bahar

bulbulen chahkaratti hain shakh-e-gul par ja baja

bulbulen kya fi alhaqiqat chahchahati hai bahar

hauz-o-fawaron ko de kar abru phir lutf se

kya muattar farsh sabze ka bichhati hai bahar

jumbish-e-bad-e-saba se ho ke ham dosh nishat

sath har sabze ke kya kya lahlahati hai bahar

khalq ko har lahza apne husn ki rangat dikha

be takalluf kya hi har dil mein samiti hai bahar

majma-e-khuban hujum-e-ashiqan aur josh-e-gul

dekh in rangon ko kya kya khulkhilati hai bahar

gul rukhon ki dekh kar gul baziyan har dam nazir

gul idhar khandan idhar dhumen machati hai bahar