باہم بلند و پست ہیں کیف شراب کے

باہم بلند و پست ہیں کیف شراب کے

آنکھوں میں ہیں طلوع و غروب آفتاب کے

پیتے ہیں سرخ و زرد پیالے شراب کے

کیا کیا ہیں اوج و پست میں رنگ آفتاب کے

برسوں سے ڈھونڈھتا ہے مضامیں شراب کے

گردوں الٹ رہا ہے ورق آفتاب کے

ساقی انڈیل جام صبوحی سبو کی خیر

مشتاق کب سے ہیں لب شب آفتاب کے

اٹھے وہ دود دل کہ فلک ہو گیا سیاہ

گل ہو گئے چراغ مہ و آفتاب کے

لکھوں جو ان کے چہرۂ روشن کا وصف میں

پیدا کروں زبان و دہن آفتاب کے

دھو دے شراب سے مرے انگور زخم کو

تا جلوے بخشیں زخم کہن آفتاب کے

کھو دے گا دود آہ فلک کی برہنگی

ڈالے گی شام منہ پہ نقاب آفتاب کے

خالی کہاں فلک ستم روزگار سے

رکھتا ہے دل پہ داغ مہ و آفتاب کے

جانے تو دو فلک پہ مرے نالۂ جنوں

پرزے اڑائیں گے ورق آفتاب کے

اے چرخ پیر دیکھ لیں اٹھکھیلیاں تری

یاد آ گئے ہمیں بھی زمانے شباب کے

پائی ہے میں نے زخم سے تعلیم خامشی

گویا لب سکوت دہن ہیں جواب کے

محروم آرزو ہیں صدائے شکست میں

رہ رہ گئے ہیں بھر کے پھپھولے حباب کے

کس اعتبار میں نفس چند اے نسیمؔ

شب ہر کے واسطے یہ تماشے ہیں خواب کے

baham buland-o-past hain kaif-e-sharab ke

ankhon mein hain tulu-o-ghurub-e-aftab ke

pite hain surkh-o-zard pyale sharab ke

kya kya hain auj-o-past mein rang aftab ke

barson se dhundhta hai mazamin sharab ke

gardun ulat raha hai waraq aftab ke

saqi undel jam-e-sabuhi subu ki khair

mushtaq kab se hain lab-e-shab aftab ke

uthe wo dud-e-dil ke falak ho gaya siyah

gul ho gae charagh-e-mah-o-aftab ke

likhun jo un ke chehra-e-raushan ka wasf mein

paida karun zaban-o-dahan aftab ke

dho de sharab se mire angur zakhm ko

ta jalwe bakhshen zakhm-e-kuhan aftab ke

kho dega dud ah falak ki barahnagi

dalegi sham munh pe naqab aftab ke

khali kahan falak sitam-e-rozgar se

rakhta hai dil pe dagh-e-mah-o-aftab ke

jane to do falak pe mire nala-e-junun

purze uraenge waraq-e-aftab ke

ai charkh-e-pir dekh len athkheliyan tiri

yad a gae hamen bhi zamane shabab ke

pai hai main ne zakhm se taalim-e-khamushi

goya lab-e-sukut-e-dahan hain jawab ke

mahrum-e-arzu hain sada-e-shikast mein

rah rah gae hain bhar ke phphule habab ke

kis etibar mein nafas-e-chand ai nasim

shab har ke waste ye tamashe hain khwab ke