بت بے‌ درد کا غم مونس ہجراں نکلا

بت بے‌ درد کا غم مونس ہجراں نکلا

درد جانا تھا جسے ہم نے وہ درماں نکلا

آنکھ جب بند ہوئی تب کھلیں آنکھیں اپنی

بزم یاراں جسے سمجھے تھے وہ زنداں نکلا

حسرت و یاس کا انبوہ فغاں کی کثرت

میں تری بزم سے کیا با سر و ساماں نکلا

خون ہو کر تو یہ دل آنکھ سے برسوں ٹپکا

نہ کوئی پر دل ناکام کا ارماں نکلا

آئنہ پیکر تصویر نگاہ مشتاق

جسے دیکھا تری محفل میں وہ حیراں نکلا

مجھ کو حیرت ہے ہوا کیا دم رخصت ہمدم

جان نکلی مرے پہلو سے کہ جاناں نکلا

خوب دوزخ کی مصیبت سے بچے ہم حسرتؔ

اس کا داروغہ وہی یار کا درباں نکلا

but-e-be dard ka gham munis-e-hijran nikla

dard jana tha jise ham ne wo darman nikla

ankh jab band hui tab khulen ankhen apni

bazm-e-yaran jise samjhe the wo zindan nikla

hasrat-o-yas ka amboh fughan ki kasrat

main tiri bazm se kya ba sar-o-saman nikla

khun ho kar to ye dil ankh se barson tapka

na koi par dil-e-nakam ka arman nikla

aina paikar-e-taswir nigah-e-mushtaq

jise dekha tiri mahfil mein wo hairan nikla

mujh ko hairat hai hawa kya dam-e-rukhsat hamdam

jan nikli mire pahlu se ke janan nikla

khub dozakh ki musibat se bachche ham hasrat

us ka darogha wahi yar ka darban nikla