بطور یادگار زہد مے خانے میں رکھ دینا

بطور یادگار زہد مے خانے میں رکھ دینا

مری ٹوٹی ہوئی توبہ کو پیمانے میں رکھ دینا

کہا تھا اے دل نافہم و ناداں تجھ سے یہ کس نے

خدا خانے کی حرمت کو صنم خانے میں رکھ دینا

پسند آئے نہ آئے منحصر ہے یہ طبیعت پر

کسی کے سامنے دل ہم کو نذرانے میں رکھ دینا

دوبارا پھر کسی دن میرے کام آئے گی اے ساقی

جو مے پینے سے بچ جائے وہ پیمانے میں رکھ دینا

کہیں آئیں کہیں جائیں کہیں اٹھیں کہیں بیٹھیں

قدم ہر پھر کر اپنا ہم کو بت خانے میں رکھ دینا

چراغ انجمن اپنی ضیا پھیلانے والا ہے

اٹھا کر شعلۂ الفت کو پروانے میں رکھ دینا

کہاں ہم ڈھونڈتے تجھ کو پھریں گے اس گھڑی ساقی

صبوحی کے لئے تھوڑی سی پیمانے میں رکھ دینا

نظر آتے ہیں کچھ انگور مجھ کو اے مرے ساقی

لہو توبہ کا ان کے ایک اک دانے میں رکھ دینا

خطائے عشق پر کیوں نوحؔ اپنی جان کھو بیٹھے

رقم اتنی بڑی اور اس کو جرمانے میں رکھ دینا

bataur-e-yadgar-e-zohd-e-mai khane mein rakh dena

miri tuti hui tauba ko paimane mein rakh dena

kaha tha ai dil-e-nafahm-o-nadan tujh se ye kis ne

khuda khane ki hurmat ko sanam khane mein rakh dena

pasand ae na ae munhasir hai ye tabiat par

kisi ke samne dil ham ko nazrane mein rakh dena

dobara phir kisi din mere kam aegi ai saqi

jo mai pine se bach jae wo paimane mein rakh dena

kahin aen kahin jaen kahin uthen kahin baithen

qadam har phir kar apna ham ko but khane mein rakh dena

charagh-e-anjuman apni ziya phailane wala hai

utha kar shola-e-ulfat ko parwane mein rakh dena

kahan ham dhundte tujh ko phirenge us ghari saqi

sabuhi ke liye thori si paimane mein rakh dena

nazar ate hain kuchh angur mujh ko ai mire saqi

lahu tauba ka un ke ek ik dane mein rakh dena

khata-e-ishq par kyun nuh apni jan kho baithe

raqam itni bari aur us ko jurmane mein rakh dena