بلا سے ہیں جو یہ پیشِ نظر در و دیوار

بلا سے ہیں جو یہ پیشِ نظر در و دیوار

نگاہِ شوق کو ہیں بال و پر در و دیوار

وفورِ اشک نے کاشانے کا کیا یہ رنگ

کہ ہو گئے مرے دیوار و در در و دیوار

نہیں ہے سایہ، کہ سن کر نوید مَقدمِ یار

گئے ہیں چند قدم پیشتر در و دیوار

ہوئی ہے کس قدر ارزانیِ مئے جلوہ

کہ مست ہے ترے کوچے میں ہر در و دیوار

جو ہے تجھے سرِ سودائے انتظار، تو آ

کہ ہیں دکانِ متاعِ نظر در و دیوار

ہجومِ گریہ کا سامان کب کیا میں نے

کہ گر پڑے نہ مرے پاؤں پر در و دیوار

وہ آ رہا مرے ہم سایہ میں، تو سائے سے

ہوئے فدا در و دیوار پر در و دیوار

نظر میں کھٹکے ہے بِن تیرے گھر کی آبادی

ہمیشہ روتے ہیں ہم دیکھ کر در و دیوار

نہ پوچھ بے خودیِ عیشِ مَقدمِ سیلاب

کہ ناچتے ہیں پڑے سر بسر در و دیوار

نہ کہہ کسی سے کہ غالبؔ نہیں زمانے میں

حریف رازِ محبت مگر در و دیوار

bala se hain jo ye pesh-e-nazar dar-o-diwar

nigah-e-shauq ko hain bal-o-par dar-o-diwar

wafur-e-ashk ne kashane ka kya ye rang

ke ho gae mire diwar-o-dar dar-o-diwar

nahin hai saya, ke sun kar nawed-e-maqdam-e-yar

gae hain chand qadam peshtar dar-o-diwar

hui hai kis qadar arzani-e-mai-e-jalwa

ke mast hai tire kuche mein har dar-o-diwar

jo hai tujhe sar-e-sauda-e-intizar, to a

ke hain dukan-e-mata-e-nazar dar-o-diwar

hujum-e-girya ka saman kab kiya main ne

ke gir pare na mire paon par dar-o-diwar

wo a raha mire ham saya mein, to sae se

hue fida dar-o-diwar par dar-o-diwar

nazar mein khatke hai bin tere ghar ki abadi

hamesha rote hain ham dekh kar dar-o-diwar

na puchh be khudi-e-aish-e-maqdam-e-sailab

ke nachte hain pare sar basar dar-o-diwar

na kah kisi se ke ghalib nahin zamane mein

harif-e-raz-e-mohabbat magar dar-o-diwar