بلائیں آنکھوں سے ان کی مدام لیتے ہیں

بلائیں آنکھوں سے ان کی مدام لیتے ہیں

ہم اپنے ہاتھوں کا مژگاں سے کام لیتے ہیں

ہم ان کی زلف سے سودا جو وام لیتے ہیں

تو اصل و سود وہ سب دام دام لیتے ہیں

شب وصال کے روز فراق میں کیا کیا

نصیب مجھ سے مرے انتقام لیتے ہیں

قمر ہی داغ غلامی فقط نہیں رکھتا

وہ مول ایسے ہزاروں غلام لیتے ہیں

ہم ان کے زور کے قائل ہیں ہیں وہی شہ زور

جو عشق میں دل مضطر کو تھام لیتے ہیں

قتیل ناز بتاتے نہیں تجھے قاتل

جب ان سے پوچھو اجل ہی کا نام لیتے ہیں

ترے اسیر جو صیاد کرتے ہیں فریاد

تو پھر وہ دم ہی نہیں زیر دام لیتے ہیں

جھکائے ہے سر تسلیم ماہ نو پر وہ

غرور حسن سے کس کا سلام لیتے ہیں

ترے خرام کے پیرو ہیں جتنے فتنے ہیں

قدم سب آن کے وقت خرام لیتے ہیں

ہمارے ہاتھ سے اے ذوقؔ وقت مے نوشی

ہزار ناز سے وہ ایک جام لیتے ہیں

balaen ankhon se un ki mudam lete hain

ham apne hathon ka mizhgan se kam lete hain

ham un ki zulf se sauda jo wam lete hain

tu asl-o-sud wo sab dam dam lete hain

shab-e-wisal ke roz-e-firaq mein kya kiya

nasib mujh se mire intiqam lete hain

qamar hi dagh-e-ghulami faqat nahin rakhta

wo mol aise hazaron ghulam lete hain

ham un ke zor ke qail hain hain wahi shah zor

jo ishq mein dil-e-muztar ko tham lete hain

qatil-e-naz batate nahin tujhe qatil

jab un se puchho ajal hi ka nam lete hain

tire asir jo sayyad karte hain fariyad

to phir wo dam hi nahin zer-e-dam lete hain

jhukae hai sar-e-taslim mah-e-nau par wo

ghurur-e-husn se kis ka salam lete hain

tire khiram ke pairo hain jitne fitne hain

qadam sab an ke waqt-e-khiram lete hain

hamare hath se ai zauq-e-waqt-e-mai noshi

hazar naz se wo ek jam lete hain