بلبل نے جسے جا کے گلستان میں دیکھا

بلبل نے جسے جا کے گلستان میں دیکھا

ہم نے اسے ہر خار بیابان میں دیکھا

روشن ہے وہ ہر ایک ستارے میں زلیخا

جس نور کو تو نے سر کنعان میں دیکھا

برہم کرے جمعیت کونین جو پل میں

لٹکا وہ تری زلف پریشان میں دیکھا

واعظ تو سنے بولے ہے جس روز کی باتیں

اس روز کو ہم نے شب ہجران میں دیکھا

اے زخم جگر سودۂ الماس سے خو کر

کتنا وہ مزا تھا جو نمک دان میں دیکھا

سوداؔ جو ترا حال ہے اتنا تو نہیں وہ

کیا جانیے تو نے اسے کس آن میں دیکھا

bulbul ne jise ja ke gulistan mein dekha

ham ne use har khar bayaban mein dekha

raushan hai wo har ek sitare mein zulekha

jis nur ko tu ne sar kanan mein dekha

barham kare jamiyyat kaunain jo pal mein

latka wo tiri zulf-e-pareshan mein dekha

waiz to sune bole hai jis roz ki baten

us roz ko ham ne shab hijran mein dekha

ai zakhm-e-jigar suda-e-almas se khu kar

kitna wo maza tha jo namak dan mein dekha

sauda jo tira hal hai itna to nahin wo

kya janiye tu ne use kis an mein dekha