اے بت جفا سے اپنی لیا کر وفا کا کام

اے بت جفا سے اپنی لیا کر وفا کا کام

بندوں کے کام آ کہ یہی ہے خدا کا کام

کس جا تھا قصد شوق نے پہنچا دیا کدھر

کہتے نہ تھے ٹھگوں سے نہ لے رہ نما کا کام

کہتا ہے دل سنا مجھے گیسو کی داستاں

آج اس نے سر پہ ڈال دیا ہے بلا کا کام

تاثیر کو نہ آہ سے پوچھوں تو کیا کروں

کیوں خود اٹھا لیا دل بے مدعا کا کام

اپنی سی تو تو کر انہیں پھر اختیار ہے

سننا ہے ان کا کام پہنچنا دعا کا کام

سینے میں داغ کھلتے ہی جاتے ہیں ہر نفس

اب اپنی سانس کرتی ہے باد صبا کا کام

موسیٰ فقط نہ تھے ترے آئینہ داروں میں

عیسیٰ بھی کرتے تھے لب معجزنما کا کام

ہر رات اپنی آنکھوں کو رونا ہے فرض عین

طاعت گزار کرتے ہیں جیسے خدا کا کام

تھا بھی ذلیل حسن کی سرکار میں یہ دل

کم بخت کو سپرد ہوا التجا کا کام

اے شادؔ میری سخت زبانی پہ ہے خموش

ناصح بھی اب تو کرنے لگا انبیا کا کام

ai but jafa se apni liya kar wafa ka kam

bandon ke kam a ke yahi hai khuda ka kam

kis ja tha qasd-e-shauq ne pahuncha diya kidhar

kahte na the thagon se na le rah numa ka kam

kahta hai dil suna mujhe gesu ki dastan

aj us ne sar pe dal diya hai bala ka kam

tasir ko na ah se puchhun to kya karun

kyun khud utha liya dil-e-be muddaa ka kam

apni si to to kar unhen phir ikhtiyar hai

sunna hai un ka kam pahunchna dua ka kam

sine mein dagh khulte hi jate hain har nafas

ab apni sans karti hai bad-e-saba ka kam

musa faqat na the tire aina daron mein

isa bhi karte the lab-e-mojiznuma ka kam

har rat apni ankhon ko rona hai farz-e-ain

taat guzar karte hain jaise khuda ka kam

tha bhi zalil husn ki sarkar mein ye dil

kam bakht ko supurd hua iltija ka kam

ai shad meri sakht zabani pe hai khamosh

naseh bhi ab to karne laga ambiya ka kam