اے دل وہ عاشقی کے فسانے کدھر گئے

اے دل وہ عاشقی کے فسانے کدھر گئے

وہ عمر کیا ہوئی وہ زمانے کدھر گئے

ویراں ہیں صحن و باغ بہاروں کو کیا ہوا

وہ بلبلیں کہاں وہ ترانے کدھر گئے

ہے نجد میں سکوت ہواؤں کو کیا ہوا

لیلائیں ہیں خموش دوانے کدھر گئے

اجڑے پڑے ہیں دشت غزالوں پہ کیا بنی

سونے ہیں کوہسار دوانے کدھر گئے

وہ ہجر میں وصال کی امید کیا ہوئی

وہ رنج میں خوشی کے بہانے کدھر گئے

دن رات مے کدے میں گزرتی تھی زندگی

اخترؔ وہ بے خودی کے زمانے کدھر گئے

ai dil wo ashiqi ke fasane kidhar gae

wo umr kya hui wo zamane kidhar gae

wiran hain sehn-o-bagh baharon ko kya hua

wo bulbulen kahan wo tarane kidhar gae

hai najd mein sukut hawaon ko kya hua

lilaen hain khamosh diwane kidhar gae

ujre pare hain dasht ghazalon pe kya bani

sone hain kohsar diwane kidhar gae

wo hijr mein wisal ki ummid kya hui

wo ranj mein khushi ke bahane kidhar gae

din rat mai kade mein guzarti thi zindagi

akhtar wo be khudi ke zamane kidhar gae