اے آہ تری قدر اثر نے تو نہ جانی

اے آہ تری قدر اثر نے تو نہ جانی

گو تج کو لقب ہم نے دیا عرش مکانی

یک خلق کی نظروں میں سبک ہو گیا لیکن

کرتا ہوں میں اب تک تری خاطر پہ گرانی

ٹک دیدۂ تحقیق سے تو دیکھ زلیخا

ہر چاہ میں آتا ہے نظر یوسف ثانی

معمور ہے جس روز سے ویرانۂ دنیا

ہر جنس کے انساں کی یہ ماٹی گئی چھانی

اک وامق نو کا ہے سمجھ چاک گریباں

کرتی ہے جو رخنہ کوئی دیوار پرانی

بلبل ہی سسکتی نہ تھی کچھ باغ میں تجھ بن

شبنم گلوں کے منہ میں چواتی رہی پانی

ہے گوش زدہ خلق مرا قصۂ جانکاہ

جب سے کہ نہ سمجھے تھا تو چڑیا کی کہانی

جوں شمع مجھے شرم ہے زنار کی اے شیخ

مالا نہ جپوں رات کو بے اشک فشانی

جس سمت نظر موج سراب آوے تو یہ جان

ہووے گی کسی زلف چلیپا کی نشانی

کیا کیا ملے لیلیٰ منشاں خاک میں سوداؔ

گو اپنے بھی محبوب کی دیکھی نہ جوانی

ai ah tiri qadr asar ne to na jani

go taj ko laqab ham ne diya arsh makani

yak khalq ki nazron mein subuk ho gaya lekin

karta hun main ab tak tiri khatir pe girani

tuk dida-e-tahqiq se to dekh zulekha

har chah mein ata hai nazar yusuf-e-sani

maamur hai jis roz se wirana-e-duniya

har jins ke insan ki ye mati gai chhani

ik wamiq nau ka hai samajh chak-e-gareban

karti hai jo rakhna koi diwar purani

bulbul hi sisakti na thi kuchh bagh mein tujh bin

shabnam gulon ke munh mein chiwati rahi pani

hai gosh zada khalq mira qissa-e-jankah

jab se ke na samjhe tha to chiriya ki kahani

jun shama mujhe sharm hai zunnar ki ai shaikh

mala na japun rat ko be ashk fishani

jis samt nazar mauj-e-sarab awe to ye jan

howe gi kisi zulf-e-chalepa ki nishani

kya kya mile laila manishan khak mein sauda

go apne bhi mahbub ki dekhi na jawani