اے ستم آزما جفا کب تک

اے ستم آزما جفا کب تک

کشتۂ زندگی وفا کب تک

گرمیٔ کوشش جفا کب تک

دعویٔ شہرت وفا کب تک

اے دل زہد خو ریا کب تک

نامرادانہ مدعا کب تک

ایک میں مل گیا خدا مارا

یوں نباہے گا دوسرا کب تک

امتحاں پر یہ امتحاں تا چند

آزما آزمائے گا کب تک

حسرت آئے گی دم میں سو سو بار

اے ہوس شور مرحبا کب تک

قدرت صبر عاقبت کتنی

جرأت طاقت آزما کب تک

تم سمجھ جاؤ میری خاموشی

نہ کہوں کہئے مدعا کب تک

کیجئے اب مرے نباہ کی فکر

یار صبر گریز پا کب تک

خواب میں بھی وہ آئیں گے تا چند

میں ملا بھی تو یوں ملا کب تک

دل میں کب تک تمہارے کھٹکوں گا

چشم دشمن میں میری جا کب تک

تندرستیٔ دل ہے بے جانی

درد بے درد کی دوا کب تک

ترک کی صاف اس نے گویائی

نرگس سرمہ سا خفا کب تک

اے دل بے قرار و بے آرام

نالہ تا چند تا کجا کب تک

اے قلقؔ وصل میں بھی ہوں ناشاد

طالع نارسا رسا کب تک

ai sitam azma jafa kab tak

kushta-e-zindagi wafa kab tak

garmi-e-koshish-e-jafa kab tak

daawa-e-shohrat-e-wafa kab tak

ai dil-e-zohd khu riya kab tak

namuradana muddaa kab tak

ek main mil gaya khuda mara

yun nibahega dusra kab tak

imtihan par ye imtihan ta chand

azma azmaega kab tak

hasrat aegi dam mein sau sau bar

ai hawas shor-e-marhaba kab tak

qudrat-e-sabr aqibat kitni

jurat-e-taqat azma kab tak

tum samajh jao meri khamoshi

na kahun kahiye muddaa kab tak

kijiye ab mire nibah ki fikr

yar sabr-e-gurez pa kab tak

khwab mein bhi wo aenge ta chand

main mila bhi to yun mila kab tak

dil mein kab tak tumhare khatkunga

chashm-e-dushman mein meri ja kab tak

tandurusti-e-dil hai be jani

dard-e-be dard ki dawa kab tak

tark ki saf us ne goyai

nargis-e-surma sa khafa kab tak

ai dil-e-be qarar-o-be aram

nala ta chand ta kuja kab tak

ai qalaq wasl mein bhi hun nashad

tale-e-narasa rasa kab tak