اے شمع دل افروز شب تار محبت — میر محمدی بیدار (Mir Mohammadi Bedar)

اے شمع دل افروز شب تار محبت

بخشے ہے یہی گرمی بازار محبت

کرتے ہیں عبث مجھ دل بیمار کا درماں

وابستہ مری جاں سے ہے آزار محبت

اے لالہ رخاں ان کے تئیں داغ نہ سمجھو

پھولا ہے مرے سینہ میں گل زار محبت

گر ہم سے چھپاتا ہے تو بیدارؔ ولیکن

انکار ہی تیرا ہے یہ اقرار محبت

رہتا ہے مری جان کہیں عشق بھی پنہاں

ظاہر ہیں تری شکل سے آثار محبت