اے شہنشاہ فلک منظر بے مثل و نظیر

اے شہنشاہ فلک منظر بے مثل و نظیر

اے جہاندار کرم شیوۂ بے شبہ و عدیل

پانو س تیرے ملے فرق ارادت اورنگ

فرق سے تیرے کرے کسب سعادت اکلیل

تیرا انداز سخن شانۂ زلف الہام

تیری رفتار قلم جنبش بال جبریل

تجھ سے عالم پہ کھلا رابطۂ قرب کلیم

تجھ سے دنیا میں بچھا مائدہ بذل خلیل

بہ سخن اوج وہ مرتبۂ معنی و لفظ

بہ کرم داغ نہ ناصیۂ قلزم و نیل

تاترے وقت میں ہو عیش و طرب کی توفیر

تاترے عہد میں ہو رنج و الم کی تقلیل

ماہ نے چھوڑ دیا ثور سے جانا باہر

زہرہ نے ترک کیا حوت سے کرنا تحویل

تیری دانش مری اصلاح مفاسد کی رہین

تیری بخشش مرے انجاح مقاصد کی کفیل

تیرا اقبال ترحم مرے جینے کی نوید

تیرا انداز تغافل مرے مرنے کی دلیل

بخت ناساز نے چاہا کہ نہ دے مجھ کو اماں

چرخ کج باز نے چاہا کہ کرے مجھ کو ذلیل

پیچھے ڈالی ہے سر رشتۂ اوقات میں گانٹھ

پہلے ٹھونکی ہے بن ناخن تدبیر میں کیل

تپش دل نہیں بے رابطۂ خوف عظیم

کشش دم نہیں بے ضابطۂ جر ثقیل

در معنی سے مرا صفحہ لقا کی داڑھی

غم گیتی سے مرا سینہ عمر کی زنبیل

فکر میری گہر اندوز اشارات کثیر

کلک میری رقم آموز عبارات قلیل

میرے ابہام پہ ہوتی ہے تصدق توضیح

میرے اجمال سے کرتی ہے تراوش تفصیل

نیک ہوتی مری حالت تو نہ دیتا تکلیف

جمع ہوتی مری خاطر تو نہ کرتا تعجیل

قبلۂ کون و مکاں خستہ نوازی میں یہ دیر

کعبۂ امن و اماں عقدہ کشائی میں یہ ڈھیل

ai shahanshah-e-falak manzar-e-be misl-o-nazir

ai jahandar karam shewa-e-be shuba-o-adil

paon s tere mile farq-e-iradat-e-aurang

farq se tere kare kasb-e-saadat-e-iklil

tera andaz-e-sukhan shana-e-zulf-e-ilham

teri raftar-e-qalam jumbish-e-bal-e-jibril

tujh se alam pe khula rabta-e-qurb-e-kalim

tujh se duniya mein bichha maida-e-bazl-e-khalil

ba sukhan auj wo martaba-e-maani-o-lafz

ba karam dagh na-e-nasiya-e-qulzum-o-nil

tatire waqt mein ho aish-o-tarab ki tofair

tatire ahd mein ho ranj-o-alam ki taqlil

mah ne chhor diya saur se jana bahar

zohra ne tark kiya hut se karna tahwil

teri danish miri islah-e-mafasid ki rahin

teri bakhshish mire injah-e-maqasid ki kafil

tera iqbal-e-tarahhum mire jine ki nawed

tera andaz-e-taghaful mire marne ki dalil

bakht-e-nasaz ne chaha ke na de mujh ko aman

charkh-e-kaj baz ne chaha ke kare mujh ko zalil

pichhe dali hai sar-e-rishta-e-auqat mein ganth

pahle thonki hai ban-e-nakhun-e-tadbir mein kil

tapish-e-dil nahin be rabta-e-khauf-e-azim

kashish-e-dam nahin be zabta-e-jarr-e-saqil

dar-e-maani se mira safha liqa ki darhi

gham-e-giti se mira sina umar ki zambil

fikr meri guhar andoz-e-isharat-e-kasir

kilk meri raqam amoz-e-abarat-e-qalil

mere ibham pe hoti hai tasadduq tozeh

mere ijmal se karti hai tarawish tafsil

nek hoti miri halat to na deta taklif

jama hoti miri khatir to na karta taajil

qibla-e-kaun-o-makan khasta nawazi mein ye der

kaaba-e-amn-o-aman uqda kushai mein ye dhil