اک نو بہار ناز کو مہماں کریں گے ہم

اک نو بہار ناز کو مہماں کریں گے ہم

ہر داغ دل کو رشک گلستاں کریں گے ہم

ساغر میں نور دیدۂ انجم انڈیل کر

پھر تیرگیٔ غم میں چراغاں کریں گے ہم

اڑ جائیں گی فضا میں بہاروں کی دھجیاں

جس وقت تار تار گریباں کریں گے ہم

کہتے ہیں آسماں پہ وہ زلفیں بکھیر کر

جھلسی ہوئی زمین پہ احساں کریں گے ہم

جی بھر کے ہم کو کر لے پریشان آسماں

اک روز آسماں کو پریشاں کریں گے ہم

اے وقت سن کہ آئے گا جب بھی ہمارا وقت

طوفاں کو موج موج کو طوفاں کریں گے ہم

جب تک ہمارے سامنے جام شراب ہے

برہم مزاج گردش دوراں کریں گے ہم

وہ آرزو کہ دل سے زباں تک نہ آ سکے

کچھ اس کا تذکرہ بھی مری جاں کریں گے ہم

دور خزاں سے کوئی کہے جا کے اے مجیدؔ

پھر اہتمام جشن بہاراں کریں گے ہم

ik nau bahar-e-naz ko mehman karenge ham

har dagh-e-dil ko rashk-e-gulistan karenge ham

saghar mein nur-e-dida-e-anjum undel kar

phir tirgi-e-gham mein charaghan karenge ham

ur jaengi faza mein baharon ki dhajjiyan

jis waqt-e-tar tar-e-gareban karenge ham

kahte hain asman pe wo zulfen bikher kar

jhulsi hui zamin pe ehsan karenge ham

ji bhar ke ham ko kar le pareshan asman

ik roz-e-asman ko pareshan karenge ham

ai waqt sun ke aega jab bhi hamara waqt

tufan ko mauj mauj ko tufan karenge ham

jab tak hamare samne jam-e-sharab hai

barham mizaj gardish-e-dauran karenge ham

wo arzu ke dil se zaban tak na a sake

kuchh us ka tazkira bhi miri jan karenge ham

daur-e-khizan se koi kahe ja ke ai majid

phir ehtimam jashn-e-baharan karenge ham