اگر وہ اپنے حسین چہرے کو بھول کر بے نقاب کر دے

اگر وہ اپنے حسین چہرے کو بھول کر بے نقاب کر دے

تو ذرے کو ماہتاب اور ماہتاب کو آفتاب کر دے

تری محبت کی وادیوں میں مری جوانی سے دور کیا ہے

جو سادہ پانی کو اک نشیلی نظر میں رنگیں شراب کر دے

حریم عشرت میں سونے والے شمیم گیسو کی مستیوں سے

مری جوانی کی سادہ راتوں کو اب تو سرشار خواب کر دے

مزے وہ پائے ہیں آرزو میں کہ دل کی یہ آرزو ہے یا رب

تمام دنیا کی آرزوئیں مرے لیے انتخاب کر دے

نظر نا آنے پہ ہے یہ حالت کہ جنگ ہے شیخ و برہمن میں

خبر نہیں کیا سے کیا ہو دنیا جو خود کو وہ بے نقاب کر دے

مرے گناہوں کی شورشیں اس لیے زیادہ رہی ہیں یا رب

کہ ان کی گستاخیوں سے تو اپنے عفو کو بے حساب کر دے

خدا نہ لائے وہ دن کہ تیری سنہری نیندوں میں فرق آئے

مجھے تو یوں اپنے ہجر میں عمر بھر کو بیزار خواب کر دے

میں جان و دل سے تصور حسن دوست کی مستیوں کے قرباں

جو اک نظر میں کسی کے بے کیف آنسوؤں کو شراب کر دے

عروس فطرت کا ایک کھویا ہوا تبسم ہے جس کو اخترؔ

کہیں وہ چاہے شراب کر دے کہیں وہ چاہے شباب کر دے

agar wo apne hasin chehre ko bhul kar be naqab kar de

tu zarre ko mahtab aur mahtab ko aftab kar de

tiri mohabbat ki wadiyon mein miri jawani se dur kya hai

jo sada pani ko ik nashili nazar mein rangin sharab kar de

harim-e-ishrat mein sone wale shamim gesu ki mastiyon se

miri jawani ki sada raton ko ab to sarshar khwab kar de

maze wo pae hain arzu mein ke dil ki ye arzu hai ya rab

tamam duniya ki arzuen mire liye intikhab kar de

nazar na ane pe hai ye halat ke jang hai shaikh-o-barahman mein

khabar nahin kya se kya ho duniya jo khud ko wo be naqab kar de

mire gunahon ki shorishen is liye ziyada rahi hain ya rab

ke un ki gustakhiyon se to apne afw ko be hisab kar de

khuda na lae wo din ke teri sunahri nindon mein farq ae

mujhe to yun apne hijr mein umr bhar ko bezar khwab kar de

main jan-o-dil se tasawwur-e-husn-e-dost ki mastiyon ke qurban

jo ik nazar mein kisi ke be kaif ansuon ko sharab kar de

urus-e-fitrat ka ek khoya hua tabassum hai jis ko akhtar

kahin wo chahe sharab kar de kahin wo chahe shabab kar de