اگر کج رَو ہیں انجم، آسماں تیرا ہے یا میرا

اگر کج رَو ہیں انجم، آسماں تیرا ہے یا میرا

مجھے فکرِ جہاں کیوں ہو، جہاں تیرا ہے یا میرا؟

اگر ہنگامہ ہائے شوق سے ہے لامکاں خالی

خطا کس کی ہے یا رب! لامکاں تیرا ہے یا میرا؟

اُسے صبحِ ازل انکار کی جُرأت ہوئی کیونکر

مجھے معلوم کیا، وہ راز داں تیرا ہے یا میرا؟

محمدؐ بھی ترا، جبریل بھی، قرآن بھی تیرا

مگر یہ حرفِ شیریں ترجماں تیرا ہے یا میرا؟

اسی کوکب کی تابانی سے ہے تیرا جہاں روشن

زوالِ آدمِ خاکی زیاں تیرا ہے یا میرا؟

agar kaj rau hain anjum, asman tera hai ya mera

mujhe fikr-e-jahan kyun ho, jahan tera hai ya mera?

agar hangama ha-e-shauq se hai lamakan khali

khata kis ki hai ya rab! lamakan tera hai ya mera?

use subh-e-azal inkar ki jurat hui kyunkar

mujhe maalum kya, wo raz dan tera hai ya mera?

mohammad bhi tira, jibril bhi, quran bhi tera

magar ye harf-e-shirin tarjuman tera hai ya mera?

isi kaukab ki tabani se hai tera jahan raushan

zawal-e-adam-e-khaki ziyan tera hai ya mera?