اگر کچھ ہوش ہم رکھتے تو مستانے ہوئے ہوتے

اگر کچھ ہوش ہم رکھتے تو مستانے ہوئے ہوتے

پہنچتے جا لب ساقی کوں پیمانے ہوئے ہوتے

عبث ان شہریوں میں وقت اپنا ہم کئے ضائع

کسی مجنوں کی صحبت بیٹھ دیوانے ہوئے ہوتے

نہ رکھتا میں یہاں گر الفت لیلیٰ نگاہوں کوں

تو مجنوں کی طرح عالم میں افسانے ہوئے ہوتے

اگر ہم آشنا ہوتے تری بیگانہ خوئی سیں

برائے مصلحت ظاہر میں بیگانے ہوئے ہوتے

زبس کافر ادایوں نے چلائے سنگ بے رحمی

اگر سب جمع کرتا میں تو بت خانے ہوئے ہوتے

نہ کرتا ضبط اگر میں گریۂ بے اختیاری کوں

گزرتا جس طرف یہ پور ویرانے ہوئے ہوتے

نظر چشم خریداری سیں کرتا دلبر ناداں

اگر قطرے مرے آنسو کے دردانے ہوئے ہوتے

محبت کے نشے میں خاص انساں واسطے ورنہ

فرشتے یہ شرابیں پی کہ مستانے ہوئے ہوتے

عوض اپنے گریباں کے کسی کی زلف ہات آتی

ہمارے ہات کے پنجے مگر شانے ہوئے ہوتے

تری شمشیر ابرو سیں ہوئے سنمکھ و الا نہ

اجل کی تیغ سیں جیوں آرا دندانے ہوئے ہوتے

مزہ جو عاشقی میں ہے سو معشوقی میں ہرگز نیں

سراجؔ اب ہو چکے افسوس پروانے ہوئے ہوتے

agar kuchh hosh ham rakhte to mastane hue hote

pahunchte ja lab-e-saqi kun paimane hue hote

abas in shahriyon mein waqt apna ham kiye zae

kisi majnun ki sohbat baith diwane hue hote

na rakhta main yahan gar ulfat-e-laila nigahon kun

tu majnun ki tarah alam mein afsane hue hote

agar ham ashna hote tiri begana khui sin

bara-e-maslahat zahir mein begane hue hote

zabas kafir adayun ne chillae sang be rahmi

agar sab jama karta main to but khane hue hote

na karta zabt agar main girya-e-be ikhtiyari kun

guzarta jis taraf ye por wirane hue hote

nazar chashm-e-kharidari sin karta dilbar nadan

agar qatre mire ansu ke dardane hue hote

mohabbat ke nashe mein khas insan waste warna

farishte ye sharaben pi ke mastane hue hote

ewaz apne gareban ke kisi ki zulf hat ati

hamare hat ke panje magar shane hue hote

tiri shamshir-e-abru sin hue sunmukh-o-illa na

ajal ki tegh sin jyun ara dandane hue hote

maza jo ashiqi mein hai so maashuqi mein hargiz nain

siraj ab ho chuke afsos parwane hue hote