اگر دل واقف نیرنگیٔ طبع صنم ہوتا

اگر دل واقف نیرنگیٔ طبع صنم ہوتا

زمانہ کی دو رنگی کا اسے ہرگز نہ غم ہوتا

یہ پابند مصیبت دل کے ہاتھوں ہم تو رہتے ہیں

نہیں تو چین سے کٹتی نہ دل ہوتا نہ غم ہوتا

انہیں کی ہے وفائی کا یہ ہے آٹھوں پہر صدمہ

وہی ہوتے جو قابو میں تو پھر کاہے کو غم ہوتا

لب و چشم صنم گر دیکھنے پاتے کہیں شاعر

کوئی شیریں سخن ہوتا کوئی جادو رقم ہوتا

بہت اچھا ہوا آئے نہ وہ میری عیادت کو

جو وہ آتے تو غیر آتے جو غیر آتے تو غم ہوتا

اگر قبریں نظر آتیں نہ دارا و سکندر کی

مجھے بھی اشتیاق دولت و جاہ و حشم ہوتا

لئے جاتا ہے جوش شوق ہم کو راہ الفت میں

نہیں تو ضعف سے دشوار چلنا دو قدم ہوتا

نہ رہنے پائے دیواروں میں روزن شکر ہے ورنہ

تمہیں تو دل لگی ہوتی غریبوں پر ستم ہوتا

agar dil waqif nairangi-e-tab-e-sanam hota

zamana ki do rangi ka use hargiz na gham hota

ye paband-e-musibat dil ke hathon ham to rahte hain

nahin to chain se katti na dil hota na gham hota

unhen ki hai wafai ka ye hai athon pahar sadma

wahi hote jo qabu mein to phir kahe ko gham hota

lab-o-chashm-e-sanam gar dekhne pate kahin shayar

koi shirin sukhan hota koi jadu raqam hota

bahut achchha hua ae na wo meri ayadat ko

jo wo ate to ghair ate jo ghair ate to gham hota

agar qabren nazar atin na dara-o-sikandar ki

mujhe bhi ishtiyaq-e-daulat-o-jah-o-hasham hota

liye jata hai josh-e-shauq ham ko rah-e-ulfat mein

nahin to zof se dushwar chalna do qadam hota

na rahne pae diwaron mein rauzan shukr hai warna

tumhen to dil lagi hoti gharibon par sitam hota