اک حسیں کو دل دے کر کیا بتائیں کیا پایا

اک حسیں کو دل دے کر کیا بتائیں کیا پایا

لذت فنا چکھی زیست کا مزا پایا

منزلوں کی سختی کا غم نہیں خوشی یہ ہے

کس ہجوم حسرت میں ہم نے راستہ پایا

قدر اس کی پہچانیں آپ یا نہ پہچانیں

اپنے دل کو ہم نے تو حسب مدعا پایا

بے خودی کی حسرت کیا بے سبب میں کرتا تھا

آ کے ہوش میں سمجھا بے خودی میں کیا پایا

شیخ یہ تہی ساغر ہاں اسی کو ساقی نے

میرے کام کا پایا یا تیرے کام کا پایا

حسرتیں سراسیمہ ہر طرف نظر آئیں

کاروان دل میں نے پھر لٹا ہوا پایا

میری مستیاں سمجھیں تیری شوخیاں جانیں

تو نے کیا لیا مجھ سے میں نے تجھ سے کیا پایا

سب یہ رنگ آمیزی ہے فقط تخیل کی

کیا بتاؤں کیا کھویا کیا جتاؤں کیا پایا

پاس بیٹھ کر میرے دیکھتے نہیں مجھ کو

ان کی شرم کو میں نے صبر آزما پایا

سعی پیہم اے منظورؔ اس قدر نشاط افزا

ناامید کس سے تھے کس سے یہ صلہ پایا

ik hasin ko dil de kar kya bataen kya paya

lazzat-e-fana chakhi zist ka maza paya

manzilon ki sakhti ka gham nahin khushi ye hai

kis hujum-e-hasrat mein ham ne rasta paya

qadr us ki pahchanen ap ya na pahchanen

apne dil ko ham ne to hasb-e-muddaa paya

be khudi ki hasrat kya be sabab mein karta tha

a ke hosh mein samjha be khudi mein kya paya

shaikh ye tahi saghar han usi ko saqi ne

mere kam ka paya ya tere kam ka paya

hasraten sarasima har taraf nazar aen

karwan dil main ne phir luta hua paya

meri mastiyan samjhen teri shokhiyan janen

tu ne kya liya mujh se main ne tujh se kya paya

sab ye rang amezi hai faqat takhayyul ki

kya bataun kya khoya kya jataun kya paya

pas baith kar mere dekhte nahin mujh ko

un ki sharm ko main ne sabr azma paya

sai-e-paiham ai manzur is qadar nishat afza

naummid kis se the kis se ye sila paya