اپنے کا ہے گناہ بیگانے نے کیا کیا

اپنے کا ہے گناہ بیگانے نے کیا کیا

اس دل کو کیا کہوں کہ دوانے نے کیا کیا

یاں تک ستانا مج کو کہ رو رو کہے تو ہائے

یارو نہ تم سنا کہ فلانے نے کیا کیا

پردہ تو راز عشق سے اے یار اٹھ چکا

بے سود ہم سے منہ کے چھپانے نے کیا کیا

آنکھوں کی رہبری نے کہوں کیا کہ دل کے ساتھ

کوچے کی اس کے راہ بتانے نے کیا کیا

کام آئی کوہ کن کی مشقت نہ عشق میں

پتھر سے جوئے شیر کے لانے نے کیا کیا

ٹک در تک اپنے آ مرے ناصح کا حال دیکھ

میں تو دوانا تھا پہ سیانے نے کیا کیا

چاہوں میں کس طرح یہ زمانے کی دوستی

اوروں سے دوست ہو کے زمانے نے کیا کیا

کہتا تھا میں گلے کا ترے ہو پڑوں گا ہار

دیکھا نہ گل کو سر پہ چڑھانے نے کیا کیا

سوداؔ ہے بے طرح کا نشہ جام عشق میں

دیکھا کہ اس کو منہ کے لگانے نے کیا کیا

apne ka hai gunah begane ne kiya kya

is dil ko kya kahun ke diwane ne kya kiya

yan tak satana maj ko ke ro ro kahe to hae

yaro na tum suna ke fulane ne kya kiya

parda to raz-e-ishq se ai yar uth chuka

be sud ham se munh ke chhupane ne kya kiya

ankhon ki rahbari ne kahun kya ke dil ke sath

kuche ki us ke rah batane ne kya kiya

kam ai koh kin ki mashaqqat na ishq mein

patthar se ju-e-sher ke lane ne kya kiya

tuk dar tak apne a mire naseh ka hal dekh

main to dawana tha pe siyane ne kya kiya

chahon mein kis tarah ye zamane ki dosti

auron se dost ho ke zamane ne kya kiya

kahta tha main gale ka tire ho parunga har

dekha na gul ko sar pe charhane ne kiya kya

sauda hai be tarah ka nasha jam-e-ishq mein

dekha ke us ko munh ke lagane ne kya kiya