اپنی نظر میں ہیچ ہے سارے جہاں کی سیر

اپنی نظر میں ہیچ ہے سارے جہاں کی سیر

دل خوش نہ ہو تو کس کا تماشہ کہاں کی سیر

اب تک تو دیکھتے رہے جوبن بہار کا

آئندہ ہم کریں گے تمہاری خزاں کی سیر

دنیا کے دیکھنے کے لیے آنکھ چاہیے

جنت کی سیر سے ہے سوا اس مکاں کی سیر

کچھ جھومتے ہیں نشے میں کچھ ہیں گرے پڑے

کچھ اور ہی ہے محفل پیر مغاں کی سیر

کیوں دیکھنے لگے مری چشم پر آب کو

دریا پہ آپ کیجیے آب رواں کی سیر

کیوں آدمی کو عالم بالا کی ہو ہوس

بڑھ کر نہیں زمین سے کچھ آسماں کی سیر

دلی میں پھول والوں کی ہے ایک سیر داغؔ

بلدے میں ہم نے دیکھ لی سارے جہاں کی سیر

apni nazar mein hech hai sare jahan ki sair

dil khush na ho to kis ka tamasha kahan ki sair

ab tak to dekhte rahe joban bahar ka

ainda ham karenge tumhari khizan ki sair

duniya ke dekhne ke liye ankh chahiye

jannat ki sair se hai siwa is makan ki sair

kuchh jhumte hain nashe mein kuchh hain gire pare

kuchh aur hi hai mahfil-e-pir-e-mughan ki sair

kyun dekhne lage miri chashm par ab ko

dariya pe ap kijiye ab-e-rawan ki sair

kyun admi ko alam-e-bala ki ho hawas

barh kar nahin zamin se kuchh asman ki sair

dili mein phul walon ki hai ek sair dagh

balde mein ham ne dekh li sare jahan ki sair