اٹھنے میں درد متصل ہوں میں

اٹھنے میں درد متصل ہوں میں

گرد باد غبار دل ہوں میں

کعبے تک ساتھ آیا شوق صنم

ہائے بت خانہ کیا خجل ہوں میں

حیف کس مدعی کی جاں ہے تو

ہائے کس آشنا کا دل ہوں میں

تجھ کو دوں کیا جواب اے داور

اپنے ہی آپ منفعل ہوں میں

تیری نازک تنی پہ غور نہ کی

اپنی امید سے خجل ہوں میں

نہ ہلا اس کے در سے تا محشر

مرقد آرزو کی سل ہوں میں

خاک ہستی کی گرد باد ہے تو

آتش دل کی آب و گل ہوں میں

حد نہیں کوئی اپنی حالت کی

کہ نگاہوں میں منتقل ہوں میں

چھا گیا یہ تصور اس بت کا

نقش چیں اور بت چگل ہوں میں

ذرہ سی زندگی پہاڑ ہوئی

آنکھ کا اپنی آپ تل ہوں میں

اے قلقؔ کیوں کہ چھوڑ دوں وحشت

وضع میں اپنی مستقل ہوں میں

uthne mein dard muttasil hun main

gard-e-bad-e-ghubar-e-dil hun main

kaabe tak sath aya shauq sanam

hae but khana kya khajil hun main

haif kis muddai ki jan hai tu

hae kis ashna ka dil hun main

tujh ko dun kya jawab ai dawar

apne hi ap munfail hun main

teri nazuk tani pe ghaur na ki

apni ummid se khajil hun main

na hila us ke dar se ta mahshar

marqad-e-arzu ki sil hun main

khak hasti ki gard bad hai tu

atish-e-dil ki ab-o-gul hun main

had nahin koi apni halat ki

ke nigahon mein muntaqal hun main

chha gaya ye tasawwur us but ka

naqsh chin aur but chugul hun main

zarra si zindagi pahar hui

ankh ka apni ap til hun main

ai qalaq kyun ke chhor dun wahshat

waza main apni mustaqil hun main