اپنی جولاں‌گاہ زیرِ آسماں سمجھا تھا میں

اپنی جولاں‌گاہ زیرِ آسماں سمجھا تھا میں

آب و گِل کے کھیل کو اپنا جہاں سمجھا تھا میں

بے حجابی سے تری ٹُوٹا نگاہوں کا طلسم

اک رِدائے نیلگوں کو آسماں سمجھا تھا میں

کارواں تھک کر فضا کے پیچ و خم میں رہ گیا

مہر و ماہ و مشتری کو ہم عناں سمجھا تھا میں

عشق کی اِک جَست نے طے کر دیا قصّہ تمام

اس زمین و آسماں کو بےکراں سمجھا تھا میں

کہہ گئیں رازِ محبّت پردہ دارِیہاے شوق

تھی فغاں وہ بھی جسے ضبطِ فغاں سمجھا تھا میں

تھی کسی درماندہ رہرو کی صداے دردناک

جس کو آوازِ رحیلِ کارواں سمجھا تھا میں

apni jaulangah zer-e-asman samjha tha main

ab-o-gil ke khel ko apna jahan samjha tha main

be hijabi se tiri tuta nigahon ka tilism

ik rida-e-nilgun ko asman samjha tha main

karwan thak kar faza ke pech-o-kham mein rah gaya

mehr-o-mah-o-mushtari ko ham inan samjha tha main

ishq ki ik jast ne tai kar diya qissa tamam

is zamin-o-asman ko bekaran samjha tha main

kah gain raz-e-mohabbat parda darihae shauq

thi fughan wo bhi jise zabt-e-fughan samjha tha main

thi kisi darmanda rahrau ki sadai dardnak

jis ko awaz-e-rahil-e-karwan samjha tha main