اور مے خانہ نشیں چور بنائے نہ گئے

اور مے خانہ نشیں چور بنائے نہ گئے

ہم دھرے جاتے ہیں ناحق کہیں آئے نہ گئے

شوخیاں تیری اٹھائیں گی مجھے بزم سے کیا

ان سے تو شرم کے پردے بھی اٹھائے نہ گئے

قید نغمے کی ہوئی قید قفس پر طرہ

ہم سے صیاد کو نالے بھی سنائے نہ گئے

پردہ ڈالا تری رحمت نے مرے عصیاں پر

ان فرشتوں سے مرے عیب چھپائے نہ گئے

کون سا لطف نہ فردوس میں پایا لیکن

پھر بھی دنیا کے مرے دل سے بھلائے نہ گئے

جب چلے سوئے لحد مڑ کے نہ دیکھا گھر کو

ایسے روٹھے کہ کسی سے بھی منائے نہ گئے

یہ سمجھ کر کہ گنہ گار ہیں کس مالک کے

نہ گئے حشر میں ہم آنکھ جھکائے نہ گئے

غیر کے جلنے سے کچھ آنچ نہ آتی تم پر

کیوں الگ بیٹھے ہوئے آگ لگائے نہ گئے

نہ رہا حشر میں نظارہ سے محروم کوئی

قبر سے ایک ہمیں آج اٹھائے نہ گئے

کس نے دیکھا ہمیں کوچے میں حسینوں کے ریاضؔ

مفت بدنام ہوئے ہم کہیں آئے نہ گئے

aur mai khana nashin chur banae na gae

ham dhare jate hain nahaq kahin ae na gae

shokhiyan teri uthaengi mujhe bazm se kya

un se to sharm ke parde bhi uthae na gae

qaid naghme ki hui qaid-e-qafas par turra

ham se sayyad ko nale bhi sunae na gae

parda dala tiri rahmat ne mire isyan par

in farishton se mire aib chhupae na gae

kaun sa lutf na firdaus mein paya lekin

phir bhi duniya ke mire dil se bhulae na gae

jab chale su-e-lahad mur ke na dekha ghar ko

aise ruthe ke kisi se bhi manae na gae

ye samajh kar ke gunah gar hain kis malik ke

na gae hashr mein ham ankh jhukae na gae

ghair ke jalne se kuchh anch na ati tum par

kyun alag baithe hue ag lagae na gae

na raha hashr mein nazzara se mahrum koi

qabr se ek hamen aj uthae na gae

kis ne dekha hamen kuche mein hasinon ke riyaz

muft badnam hue ham kahin ae na gae