ان کے ہوتے کون دیکھے دیدہ و دل کا بگاڑ

ان کے ہوتے کون دیکھے دیدہ و دل کا بگاڑ

پڑ گیا دونوں میں فرط رشک سے کیسا بگاڑ

اس کی محفل کا مرقع کھینچ اے مانی مگر

اس مرقع میں ذرا تو غیر کا چہرا بگاڑ

تیرے جھکنے سے جھکے ہیں دل کے لینے کو حسیں

کم لگا کر دام اے ظالم نہ تو سودا بگاڑ

دخت رز کو شکل تیری دیکھ کر نفرت نہ ہو

تلخیٔ مے سے ارے زاہد نہ منہ اتنا بگاڑ

ہاں وہی پھر کعبہ بن جائے گا اے شیخ حرم

بت کدہ کا پہلے نقشہ کھینچ پھر نقشہ بگاڑ

ہو تعلق گل رخوں سے تو مزا ہر بات میں

کیا بناوٹ کیا کھنچاوٹ کیا لگاوٹ کیا بگاڑ

میرے حال زار پر آ جائے تجھ کو آپ رحم

او بنانے والے میرے مجھ کو تو اتنا بگاڑ

کوئی ہوں کافر ہوں یا اللہ والے اے ریاضؔ

چار دن کی زندگانی میں کسی سے کیا بگاڑ

un ke hote kaun dekhe dida-o-dil ka bigar

par gaya donon mein fart-e-rashk se kaisa bigar

us ki mahfil ka muraqqaa khinch ai mani magar

is muraqqaa mein zara to ghair ka chehra bigar

tere jhukne se jhuke hain dil ke lene ko hasin

kam laga kar dam ai zalim na to sauda bigar

dukht-e-raz ko shakl teri dekh kar nafrat na ho

talkhi-e-mai se are zahid na munh itna bigar

han wahi phir kaaba ban jaega ai shaikh-e-haram

but kada ka pahle naqsha khinch phir naqsha bigar

ho taalluq gul rukhon se to maza har bat mein

kya banawat kya khinchot kya lagawat kya bigar

mere hal-e-zar par a jae tujh ko ap rahm

o banane wale mere mujh ko to itna bigar

koi hun kafir hun ya allah wale ai riyaz

char din ki zindagani mein kisi se kya bigar