خدا اس قوم کو عزت نہیں دیتا زمانے میں

خدا اس قوم کو عزت نہیں دیتا زمانے میں

جسے قومی بزرگوں کا ادب کرنا نہیں آتا

یقیناً ہوتی ہے مرنے سے بد تر زندگی اس کی

جسے ملک و وطن کے واسطے مرنا نہیں آتا

بتوں کا خوف رکھتا ہے اسے لرزہ بہ تن ہر دم

خدا کے خوف سے جس شخص کو ڈرنا نہیں آتا

جواں مردوں ہی کا ہے کام قطع راہ حریت

کہ اس منزل میں بزدل کو قدم دھرنا نہیں آتا

مقدر میں ہے اس کے عمر بھر پامال غم رہنا

جسے پامالیٔ ملت کا غم کرنا نہیں آتا

اسے زندہ نہ سمجھو سانس ہے گو جس کے سینے میں

مگر آزادیٔ ملت کا دم بھرنا نہیں آتا

بقول حضرت اکبر فنا میں ہے بقا مضمر

اسے جینا نہیں آتا جسے مرنا نہیں آتا

khuda is qaum ko izzat nahin deta zamane mein

jise qaumi buzurgon ka adab karna nahin ata

yaqinan hoti hai marne se bad tar zindagi us ki

jise mulk-o-watan ke waste marna nahin ata

buton ka khauf rakhta hai use larza ba tan har dam

khuda ke khauf se jis shakhs ko darna nahin ata

jawan mardon hi ka hai kam qat-e-rah-e-hurriyyat

ke is manzil mein buzdil ko qadam dharna nahin ata

muqaddar mein hai us ke umr bhar pamal-e-gham rahna

jise pamali-e-millat ka gham karna nahin ata

use zinda na samjho sans hai go jis ke sine mein

magar azadi-e-millat ka dam bharna nahin ata

baqaul-e-hazrat-e-akbar fana mein hai baqa muzmar

use jina nahin ata jise marna nahin ata