Arooz is now on the App Store, for iPhone and iPad. Download →

All poetry

اسیری میں تباہی رونق کاشانہ ہو جائے

محمد زکریا خان

اسیری میں تباہی رونق کاشانہ ہو جائے

قفس ہی نالوں سے جل کر چراغ خانہ ہو جائے

تغافل سازگار شوق اہل درد کیا ہوگا

ادا سے دو فریب ایسا کہ دل دیوانہ ہو جائے

نہ کہنا غیر سے قاصد کہ میں مطلب نہیں سمجھا

پیام یار ہے ہے معنئ بیگانہ ہو جائے

نہیں کیوں حضرت موسیٰ کی بیتابی کے ہم پیرو

کہ راز دل زباں پر آئے اور افسانہ ہو جائے

کہاں تک ضبط بے تابی دل مسکین مجھے ڈر ہے

تری خوئے تحمل سے وہ بے پروا نہ ہو جائے

فغاں کرتے ہوئے جا پہنچو اس کی بزم عشرت میں

کبھی تو اے ذکیؔ یہ شوخئ رندانہ ہو جائے