اشک آنکھوں میں ڈر سے لا نہ سکے

اشک آنکھوں میں ڈر سے لا نہ سکے

دل کی بھڑکی ہوئی بجھا نہ سکے

نہ ہلی جب زباں نزاکت سے

رہ گئے دیکھ کر بلا نہ سکے

تھیں جو اس میں حیا کی کچھ باتیں

شکوہ میرا وہ لب پہ لا نہ سکے

کیا ہوئے تیرے حوصلے اے اشک

حرف تقدیر کو مٹا نہ سکے

تھا یہ خطرہ کہیں پسند نہ ہوں

گالیاں بھی مجھے سنا نہ سکے

گو بہت پاس غیر تھا لیکن

آنکھ ہم سے بھی وہ چرا نہ سکے

پاؤں چوما کیے حنا کی طرح

جب کوئی اور رنگ لا نہ سکے

خامشی تھی بہ شکل زخم مجھے

لب تک اپنے سوال آ نہ سکے

نہ ملی اس نے پاؤں میں مہندی

رنگ اپنا عدو جما نہ سکے

اضطراب قضا ہوا یہ نسیمؔ

کہ گلے بھی اسے لگا نہ سکے

ashk ankhon mein dar se la na sake

dil ki bharki hui bujha na sake

na hili jab zaban nazakat se

rah gae dekh kar bala na sake

thin jo is mein haya ki kuchh baten

shikwa mera wo lab pe la na sake

kya hue tere hausle ai ashk

harf-e-taqdir ko mita na sake

tha ye khatra kahin pasand na hun

galiyan bhi mujhe suna na sake

go bahut pas ghair tha lekin

ankh ham se bhi wo chura na sake

paon chuma kiye hina ki tarah

jab koi aur rang la na sake

khamushi thi ba shakl-e-zakhm mujhe

lab tak apne sawal a na sake

na mili us ne paon mein mehndi

rang apna adu jama na sake

iztirab-e-qaza hua ye nasim

ke gale bhi use laga na sake