اف رے ابھار اف رے زمانہ اٹھان کا

اف رے ابھار اف رے زمانہ اٹھان کا

کل بام پر تھے آج ہے قصد آسمان کا

رونا لکھا نصیب میں ہے اپنی جان کا

شکوا نہ آپ کا نہ گلا آسمان کا

بازار میں بھی چلتے ہیں کوٹھوں کو دیکھتے

سودا خریدتے ہیں تو اونچی دکان کا

یہ بھی خدا کی شان ہم اب ایسے ہو گئے

سایا بھی بھاگتا ہے تمہارے مکان کا

کیوں غم نصیب دل کو برا کہہ رہے ہو تم

کیوں صبر لے رہے ہو کسی بے زبان کا

واعظ شراب خانے میں کھولے گا کیا زباں

ہم خوب جانتے ہیں وہ ٹرا ہے تھان کا

ہم جام مے کے بھی لب تر چوستے نہیں

چسکا پڑا ہوا ہے تمہاری زبان کا

میں دل کی واردات تو کہنے کو کہہ چلوں

کس کو یقین آئے گا میرے بیان کا

یہ تو کہا تجھے ہو لہو تھوکنا نصیب

تم نے کبھی دیا کوئی ٹکڑا بھی پان کا

میں جاؤں یا نہ جاؤں انہیں لے کے بام پر

بدلا ہوا ہے رنگ بہت آسمان کا

افسانہ تم نے قیس کا شاید سنا نہیں

ٹکڑا ہے ایک وہ بھی مری داستان کا

اب کوئی سینہ چیر کے رکھ لے کہ دل بنائے

آویزہ گر پڑا ہے کوئی ان کے کان کا

آیا جو غیر لطف بہت دیر تک رہا

بدلا تھا میں نے بھیس ترے پاسبان کا

دنیا کی پڑ رہی ہیں نگاہیں ریاضؔ پر

کس وضع کا جوان ہے کس آن بان کا

uf re ubhar uf re zamana uthan ka

kal bam par the aj hai qasd asman ka

rona likha nasib mein hai apni jan ka

shakwa na ap ka na gila asman ka

bazar mein bhi chalte hain kothon ko dekhte

sauda kharidte hain to unchi dukan ka

ye bhi khuda ki shan ham ab aise ho gae

saya bhi bhagta hai tumhare makan ka

kyun gham nasib dil ko bura kah rahe ho tum

kyun sabr le rahe ho kisi be zaban ka

waiz sharab khane mein kholega kya zaban

ham khub jante hain wo tarra hai than ka

ham jam mai ke bhi lab-e-tar chuste nahin

chaska para hua hai tumhari zaban ka

main dil ki wardat to kahne ko kah chalun

kis ko yaqin aega mere bayan ka

ye to kaha tujhe ho lahu thukanna nasib

tum ne kabhi diya koi tukra bhi pan ka

main jaun ya na jaun unhen le ke bam par

badla hua hai rang bahut asman ka

afsana tum ne qais ka shayad suna nahin

tukra hai ek wo bhi miri dastan ka

ab koi sina chir ke rakh le ke dil banae

aweza gir para hai koi un ke kan ka

aya jo ghair lutf bahut der tak raha

badla tha main ne bhes tire pasban ka

duniya ki par rahi hain nigahen riyaz par

kis waza ka jawan hai kis an ban ka