Arooz is now on the App Store, for iPhone and iPad. Download →

All poetry

ان رس بھری آنکھوں میں حیا کھیل رہی ہے

Akhtar Shirani (1905–1948)

ان رس بھری آنکھوں میں حیا کھیل رہی ہے

دو زہر کے پیالوں پہ قضا کھیل رہی ہے

ہیں نرگس و گل کس لیے مسحور تماشا

گلشن میں کوئی شوخ ادا کھیل رہی ہے

اس بزم میں جائیں تو یہ کہتی ہیں ادائیں

کیوں آئے ہو، کیا سر پہ قضا کھیل رہی ہے

اس چشم سیہ مست پہ گیسو ہیں پریشاں

میخانے پہ گھنگھور گھٹا کھیل رہی ہے

بد مستی میں تم نے انہیں کیا کہہ دیا اخترؔ

کیوں شوخ نگاہوں میں حیا کھیل رہی ہے