اسی کی ذات کو ہے دائماً ثبات و قیام

اسی کی ذات کو ہے دائماً ثبات و قیام

قدیر و حی و کریم و مہیمن و منعام

بروج بارہ میں لا کر رکھی وہ باریکی

کہ جس کو پہنچے نہ فکرت نہ دانش و اوہام

ادھر فرشتۂ کروبی اور ادھر غلماں

قلم کو لوح پہ بخشی ہے طاقت ارقام

یہ دو ہیں شمس و قمر اور ساتھ ان کے یار

عطارد و زحل و زہرہ مشتری بہرام

جو چاہیں ایک پلک ٹھہریں یہ سو طاقت کیا

پھرا کریں گے یہ آغاز سے لے تا انجام

بشر جو چاہے کہ سمجھے انہیں سو کیا امکاں

ہے یاں فرشتوں کی عاجز عقول اور افہام

نکالے ان سے گل و میوہ شاخ و برگ و بار

سب اس کے لطف و کرم کے ہیں عام یہ انعام

اسی کے باغ سے دل شاد ہو کے کھاتے ہیں

چھہارے کشمش و انجیر و پستہ و بادام

چمک رہا ہے اسی کی یہ قدرتوں کا نور

بہر زماں و بہر ساعت و بہر ہنگام

کہ اس کا شکر کریں شب سے ما بہ روز ادا

اطاعت اس کی بجا لاویں صبح سے تا شام

نظیرؔ نکتہ سمجھ مہر و فضل خالق کو

اسی کے فضل سے دونوں جہاں میں ہے آرام

usi ki zat ko hai daima sabat-o-qayam

qadir-o-hayy-o-karim-o-mahyaman-o-minam

buruj bara mein la kar rakhi wo bariki

ke jis ko pahunche na fikrat na danish-o-auham

idhar farishta-e-karrubi aur idhar ghilman

qalam ko lauh pe bakhshi hai taqat-e-irqam

ye do hain shams-o-qamar aur sath un ke yar

utarid-o-zuhal-o-zohra mushtari bahram

jo chahen ek palak thahren ye so taqat kya

phira karenge ye aghaz se le ta anjam

bashar jo chahe ke samjhe unhen so kya imkan

hai yan farishton ki ajiz uqul aur afham

nikale un se gul-o-mewa shakh-o-barg-o-bar

sab us ke lutf-o-karam ke hain am ye inam

usi ke bagh se dil shad ho ke khate hain

chhuhare kishmish-o-anjir-o-pista-o-badam

chamak raha hai usi ki ye qudraton ka nur

bahr-e-zaman-o-bahr-e-saat-o-bahr-e-hangam

ke us ka shukr karen shab se ma ba roz ada

itaat us ki baja lawen subh se ta sham

nazir nukta samajh mehr-o-fazl-e-khaliq ko

usi ke fazl se donon jahan mein hai aram