انتداب

کہاں فرشتۂ تہذیب کی ضرورت ہے

نہیں زمانۂ حاضر کو اس میں دُشواری

جہاں قِمار نہیں، زن تُنک لباس نہیں

جہاں حرام بتاتے ہیں شغلِ مے خواری

بدن میں گرچہ ہے اک رُوحِ ناشکیب و عمیق

طریقۂ اَب و جد سے نہیں ہے بیزاری

جَسوُر و زیرک و پُردم ہے بچّۂ بدوی

نہیں ہے فیضِ مکاتب کا چشمۂ جاری

نظروَرانِ فرنگی کا ہے یہی فتویٰ

وہ سرزمیں مَدنیّت سے ہے ابھی عاری!

kahan farishta-e-tahzib ki zarurat hai

nahin zamana-e-hazir ko is mein dushwari

jahan qimar nahin, zan tunuk libas nahin

jahan haram batate hain shaghl-e-mai khwari

badan mein garche hai ik ruh-e-nashikib-o-amiq

tariqa-e-ab-o-jid se nahin hai bezari

jaswur-o-zirak-o-purdam hai bachcha-e-badwi

nahin hai faiz-e-makatib ka chashma-e-jari

nazaroran-e-farangi ka hai yahi fatwa

wo sarzamin madnyyat se hai abhi ari!