ابلیس کا فرمان اپنے سیاسی فرزندوں کے نام
Allama Iqbal (1877–1938)لا کر بَرہمنوں کو سیاست کے پیچ میں
زُناّریوں کو دَیرِ کُہن سے نکال دو
وہ فاقہ کش کہ موت سے ڈرتا نہیں ذرا
رُوحِ محمدؐ اس کے بدن سے نکال دو
فکرِ عرب کو دے کے فرنگی تخیّلات
اسلام کو حِجاز و یمن سے نکال دو
افغانیوں کی غیرتِ دیں کا ہے یہ علاج
مُلّا کو اُن کے کوہ و دمن سے نکال دو
اہلِ حرم سے اُن کی روایات چھِین لو
آہُو کو مرغزارِ خُتن سے نکال دو
اقبالؔ کے نفَس سے ہے لالے کی آگ تیز
ایسے غزل سرا کو چمن سے نکال دو!
la kar barahmanon ko siyasat ke pech mein
zunnariyon ko dair-e-kuhan se nikal do
wo faqa kash ke maut se darta nahin zara
ruh-e-mohammad us ke badan se nikal do
fikr-e-arab ko de ke farangi takhayyulat
islam ko hijaz-o-yaman se nikal do
afghaniyon ki ghairat-e-din ka hai ye ilaj
mulla ko un ke koh-o-daman se nikal do
ahl-e-haram se un ki riwayat chhin lo
ahu ko marghzar-e-khutan se nikal do
iqbal ke nafas se hai lale ki ag tez
aise ghazal sara ko chaman se nikal do!