ابوالعلامعری

کہتے ہیں کبھی گوشت نہ کھاتا تھا معّری

پھل پھُول پہ کرتا تھا ہمیشہ گزر اوقات

اک دوست نے بھُونا ہوا تِیتر اسے بھیجا

شاید کہ وہ شاطِر اسی ترکیب سے ہو مات

یہ خوانِ تر و تازہ معّری نے جو دیکھا

کہنے لگا وہ صاحبِ عفران و لزومات

اے مُرغکِ بیچارہ! ذرا یہ تو بتا تُو

تیرا وہ گُنہ کیا تھا یہ ہے جس کی مکافات؟

افسوس، صد افسوس کہ شاہیں نہ بنا تُو

دیکھے نہ تری آنکھ نے فطرت کے اشارات

تقدیر کے قاضی کا یہ فتویٰ ہے ازل سے

ہے جُرمِ ضعیفی کی سزا مرگِ مفاجات!

kahte hain kabhi gosht na khata tha muarra

phal phul pe karta tha hamesha guzar auqat

ik dost ne bhuna hua titar use bheja

shayad ke wo shatir isi tarkib se ho mat

ye khwan-e-tar-o-taza muarra ne jo dekha

kahne laga wo sahab-e-afran-o-luzumat

ai murghak-e-bechara! zara ye to bata tu

tera wo gunah kya tha ye hai jis ki mukafat?

afsos, sad afsos ke shahin na bana tu

dekhe na tiri ankh ne fitrat ke isharat

taqdir ke qazi ka ye fatwa hai azal se

hai jurm-e-zaifi ki saza marg-e-mufajat!