ابر کوہسار

ہے بلندی سے فلک بوس نشیمن میرا

ابرِ کُہسار ہوں گُل پاش ہے دامن میرا

کبھی صحرا، کبھی گُلزار ہے مسکن میرا

شہر و ویرانہ مرا، بحر مرا، بَن میرا

کسی وادی میں جو منظور ہو سونا مجھ کو

سبزۂ کوہ ہے مخمل کا بچھونا مجھ کو

مجھ کو قُدرت نے سِکھایا ہے دُرافشاں ہونا

ناقۂ شاہدِ رحمت کا حُدی خواں ہونا

غم زدائے دلِ افسُردۂ دہقاں ہونا

رونقِ بزمِ جوانانِ گُلستاں ہونا

بن کے گیسو رُخِ ہستی پہ بکھر جاتا ہوں

شانۂ موجۂ صرصر سے سنور جاتا ہوں

دُور سے دیدۂ امیّد کو ترساتا ہوں

کسی بستی سے جو خاموش گزر جاتا ہوں

سَیر کرتا ہُوا جس دم لبِ جُو آتا ہوں

بالیاں نہر کو گرداب کی پہناتا ہوں

سبزۂ مزرعِ نوخیز کی امّید ہوں میں

زادۂ بحر ہوں، پروردۂ خورشید ہوں میں

چشمۂ کوہ کو دی شورشِ قلزُم میں نے

اور پرندوں کو کیا محوِ ترنّم میں نے

سر پہ سبزے کے کھڑے ہو کے کہا قُم میں نے

غنچۂ گُل کو دیا ذوقِ تبسّم میں نے

فیض سے میرے نمونے ہیں شبستانوں کے

جھونپڑے دامنِ کُہسار میں دہقانوں کے

hai bulandi se falak bos nasheman mera

abr-e-kohsar hun gul pash hai daman mera

kabhi sahra, kabhi gulzar hai maskan mera

shahr-o-wirana mira, bahr mira, ban mera

kisi wadi mein jo manzur ho sona mujh ko

sabza-e-koh hai makhmal ka bichhauna mujh ko

mujh ko qudrat ne sikhaya hai darafishan hona

naqa-e-shahid-e-rahmat ka hudi khwan hona

gham zida-e-dil-e-afsurda-e-dehqan hona

raunaq-e-bazm-e-jawanan-e-gulistan hona

ban ke gesu rukh-e-hasti pe bikhar jata hun

shana-e-mauja-e-sarsar se sanwar jata hun

dur se dida-e-ummid ko tarasita hun

kisi basti se jo khamosh guzar jata hun

sair karta hua jis dam lab-e-ju ata hun

baliyan nahr ko girdab ki pahnata hun

sabza-e-mazra-e-naukhez ki ummid hun main

zada-e-bahr hun, parwarda-e-khurshid hun main

chashma-e-koh ko di shorish-e-qulzum main ne

aur parindon ko kiya mahw-e-tarannum main ne

sar pe sabze ke khare ho ke kaha qum main ne

ghuncha-e-gul ko diya zauq-e-tabassum main ne

faiz se mere namune hain shabistanon ke

jhonpre daman-e-kohsar mein dehqanon ke