ابھی ہماری محبت کسی کو کیا معلوم

ابھی ہماری محبت کسی کو کیا معلوم

کسی کے دل کی حقیقت کسی کو کیا معلوم

یقیں تو یہ ہے وہ خط کا جواب لکھیں گے

مگر نوشتۂ قسمت کسی کو کیا معلوم

بظاہر ان کو حیا دار لوگ سمجھے ہیں

حیا میں جو ہے شرارت کسی کو کیا معلوم

قدم قدم پہ تمہارے ہمارے دل کی طرح

بسی ہوئی ہے قیامت کسی کو کیا معلوم

یہ رنج و عیش ہوئے ہجر و وصل میں ہم کو

کہاں ہے دوزخ و جنت کسی کو کیا معلوم

جو سخت بات سنے دل تو ٹوٹ جاتا ہے

اس آئینے کی نزاکت کسی کو کیا معلوم

کیا کریں وہ سنانے کو پیار کی باتیں

انہیں ہے مجھ سے عداوت کسی کو کیا معلوم

خدا کرے نہ پھنسے دام عشق میں کوئی

اٹھائی ہے جو مصیبت کسی کو کیا معلوم

ابھی تو فتنے ہی برپا کئے ہیں عالم میں

اٹھائیں گے وہ قیامت کسی کو کیا معلوم

جناب داغؔ کے مشرب کو ہم سے تو پوچھو

چھپے ہوئے ہیں یہ حضرت کسی کو کیا معلوم

abhi hamari mohabbat kisi ko kya maalum

kisi ke dil ki haqiqat kisi ko kya maalum

yaqin to ye hai wo khat ka jawab likhenge

magar nawashta-e-qismat kisi ko kya maalum

bazahir un ko haya dar log samjhe hain

haya mein jo hai shararat kisi ko kya maalum

qadam qadam pe tumhare hamare dil ki tarah

basi hui hai qayamat kisi ko kya maalum

ye ranj-o-aish hue hijr-o-wasl mein ham ko

kahan hai dozakh-o-jannat kisi ko kya maalum

jo sakht bat sune dil to tut jata hai

is aine ki nazakat kisi ko kya maalum

kiya karen wo sunane ko pyar ki baten

unhen hai mujh se adawat kisi ko kya maalum

khuda kare na phanse dam-e-ishq mein koi

uthai hai jo musibat kisi ko kya maalum

abhi to fitne hi barpa kiye hain alam mein

uthaenge wo qayamat kisi ko kya maalum

janab dagh ke mashrab ko ham se to puchho

chhupe hue hain ye hazrat kisi ko kya maalum