اس دل میں اپنی جان کبھی ہے کبھی نہیں

اس دل میں اپنی جان کبھی ہے کبھی نہیں

آباد یہ مکان کبھی ہے کبھی نہیں

غیروں کی بات کیا کہوں اس کی تو یاد میں

اپنا بھی مجھ کو دھیان کبھی ہے کبھی نہیں

وہ دن گئے جو کرتے تھے ہم متصل فغاں

اب آہ ناتوان کبھی ہے کبھی نہیں

جس آن میں رہے تو اسے جان مغتنم

یاں کی ہر ایک آن کبھی ہے کبھی نہیں

ایام وصل پر تو بھروسہ نہ کیجیو

یہ وقت میری جان کبھی ہے کبھی نہیں

عادت جو ہے ہمیشہ سے اس کی سو ہے غرض

وہ ہم پہ مہربان کبھی ہے کبھی نہیں

اس دوستی کا تیری تلون مزاجی سے

اپنے تئیں گمان کبھی ہے کبھی نہیں

مغرور ہوجیو نہ اس اوج و حشم پہ تو

یاں کی یہ عز و شان کبھی ہے کبھی نہیں

عاشق کہیں ہوا ہے حسنؔ کیا ہے اس کا حال

یہ آپ میں جوان کبھی ہے کبھی نہیں

is dil main apni jan kabhi hai kabhi nahin

abad ye makan kabhi hai kabhi nahin

ghairon ki bat kya kahun us ki to yad mein

apna bhi mujh ko dhyan kabhi hai kabhi nahin

wo din gae jo karte the ham muttasil fughan

ab ah natawan kabhi hai kabhi nahin

jis an mein rahe to use jan mughtanam

yan ki har ek an kabhi hai kabhi nahin

ayyam-e-wasl par to bharosa na kijiyo

ye waqt meri jan kabhi hai kabhi nahin

adat jo hai hamesha se us ki so hai gharaz

wo ham pe mehrban kabhi hai kabhi nahin

is dosti ka teri talawwun mizaji se

apne tain guman kabhi hai kabhi nahin

maghrur hojiyo na is auj-o-hasham pe to

yan ki ye izz-o-shan kabhi hai kabhi nahin

ashiq kahin hua hai husn kya hai us ka hal

ye ap mein jawan kabhi hai kabhi nahin