اس سے کیا خاک ہم نشیں بنتی

اس سے کیا خاک ہم نشیں بنتی

بات بگڑی ہوئی نہیں بنتی

وہ بنی ابتدائے الفت میں

دم پہ جو وقت واپسیں بنتی

آدمی سب فرشتے بن جاتے

آسماں پر اگر زمیں بنتی

میری صورت بنی تو خاک بنی

قسمت اے صورت آفریں بنتی

وعدہ کرتے ہی کیا وہ آ جاتے

رات بھر زلف عنبریں بنتی

کاش سنتا نہ کوئی شور و فغاں

دل کی جا چشم سرمگیں بنتی

تو نے ایسے بگاڑ ڈالے ہیں

ایک کی ایک سے نہیں بنتی

نہ چمکتی جو حسن کی تقدیر

کیوں تری چاند سی جبیں بنتی

پارۂ جیب سے مرے اے کاش

دست وحشت کی آستیں بنتی

بزم دنیا تھی قابل جنت

خوب بنتی اگر یہیں بنتی

طبع نازک کا لطف جب تھا داغؔ

نازنینوں میں نازنیں بنتی

us se kya khak ham nashin banti

bat bigri hui nahin banti

wo bani ibtida-e-ulfat mein

dam pe jo waqt-e-wapasen banti

admi sab farishte ban jate

asman par agar zamin banti

meri surat bani to khak bani

qismat ai surat afrin banti

waada karte hi kya wo a jate

rat bhar zulf-e-ambarin banti

kash sunta na koi shor-o-fughan

dil ki ja chashm-e-surmagin banti

tu ne aise bigar dale hain

ek ki ek se nahin banti

na chamakti jo husn ki taqdir

kyun tiri chand si jabin banti

para-e-jeb se mire ai kash

dast-e-wahshat ki astin banti

bazm-e-duniya thi qabil-e-jannat

khub banti agar yahin banti

tab-e-nazuk ka lutf jab tha dagh

nazninon mein naznin banti