آنسو

میرے پہلو میں جو بہہ نکلے تمہارے آنسو

بن گئے شام محبت کے ستارے آنسو

دیکھ سکتا ہے بھلا کون یہ پارے آنسو

میری آنکھوں میں نہ آ جائیں تمہارے آنسو

شمع کا عکس جھلکتا ہے جو ہر آنسو میں

بن گئے بھیگی ہوئی رات کے تارے آنسو

مینہ کی بوندوں کی طرح ہو گئے سستے کیوں آج

موتیوں سے کہیں مہنگے تھے تمہارے آنسو

صاف اقرار محبت ہو زباں سے کیوں کر

آنکھ میں آ گئے یوں شرم کے مارے آنسو

ہجر ابھی دور ہے میں پاس ہوں اے جان وفا

کیوں ہوئے جاتے ہیں بے چین تمہارے آنسو

صبح دم دیکھ نہ لے کوئی یہ بھیگا آنچل

میری چغلی کہیں کھا دیں نہ تمہارے آنسو

اپنے دامان و گریباں کو میں کیوں پیش کروں

ہیں مرے عشق کا انعام تمہارے آنسو

دم رخصت ہے قریب اے غم فرقت خوش ہو

کرنے والے ہیں جدائی کے اشارے آنسو

صدقے اس جان محبت کے میں اخترؔ جس کے

رات بھر بہتے رہے شوق کے مارے آنسو

mere pahlu mein jo bah nikle tumhare ansu

ban gae sham mohabbat ke sitare ansu

dekh sakta hai bhala kaun ye pare ansu

meri ankhon mein na a jaen tumhare ansu

shama ka aks jhalakta hai jo har ansu mein

ban gae bhigi hui rat ke tare ansu

menh ki bundon ki tarah ho gae saste kyun aj

motiyon se kahin mahnge the tumhare ansu

saf iqrar-e-mohabbat ho zaban se kyun kar

ankh mein a gae yun sharm ke mare ansu

hijr abhi dur hai main pas hun ai jan-e-wafa

kyun hue jate hain be chain tumhare ansu

subh dam dekh na le koi ye bhiga anchal

meri chughli kahin kha den na tumhare ansu

apne daman-o-gareban ko main kyun pesh karun

hain mire ishq ka inam tumhare ansu

dam-e-rukhsat hai qarib ai gham-e-furqat khush ho

karne wale hain judai ke ishare ansu

sadqe us jan mohabbat ke main akhtar jis ke

rat bhar bahte rahe shauq ke mare ansu