یہ گوارا کہ مرا دست تمنا باندھے

یہ گوارا کہ مرا دست تمنا باندھے

اپنی محرم کو نہ کس کر کوئی اتنا باندھے

بڑھ کے آئے نگہ شوق بلائیں لے لے

کوئی بیٹھا ہے کس انداز سے جوڑا باندھے

شہرت بے اثری کوئی مٹائے کیوں کر

ہو نہ درد آہ میں تو کوئی ہوا کیا باندھے

دھجیاں کیا مرے دامن کی مرے کام آئیں

بیٹھ کر دشت میں سب آبلۂ پا باندھے

ہے بری بات کہو کھول کے بوتل رکھ دے

شیخ پگڑی میں نہ بازار کا سودا باندھے

اک ذرا کھا لے ہوا نجد کی ٹھنڈی ٹھنڈی

کہہ دو لیلیٰ ابھی محمل میں نہ پردا باندھے

بکھری زلفیں یوں ہی لہرائیں رخ روشن پر

کبھی جوڑا نہ مرا گیسوؤں والا باندھے

جب میں دیکھوں مری آنکھوں میں مرا گھر پھر جائے

چکر اتنا تو بیاباں میں بگولا باندھے

ہم نے دیکھا طرف میکدہ جاتے تھے ریاضؔ

اک عصا تھامے عبا پہنے عمامہ باندھے

ye gawara ke mira dast-e-tamanna bandhe

apni mahram ko na kis kar koi itna bandhe

barh ke ae nigah-e-shauq balaen le le

koi baitha hai kis andaz se jora bandhe

shohrat-e-be asari koi mitae kyun kar

ho na dard ah mein to koi hua kya bandhe

dhajjiyan kya mire daman ki mire kam aen

baith kar dasht mein sab abla-e-pa bandhe

hai buri bat kaho khol ke botal rakh de

shaikh pagri mein na bazar ka sauda bandhe

ik zara kha le hua najd ki thandi thandi

kah do laila abhi mahmil mein na parda bandhe

bikhri zulfen yun hi lahraen rukh-e-raushan par

kabhi jora na mira gesuon wala bandhe

jab main dekhun miri ankhon mein mira ghar phir jae

chakkar itna to bayaban mein bagula bandhe

ham ne dekha taraf-e-maikada jate the riyaz

ik asa thame aba pahne ammama bandhe